Barca an chak, buai erawh a la reh lo

Chhungkaw buaina nei Barcelona chuan Ningani zan khan King's Cup-a an mikhual Elche 5-0 in an sawp. Hetihlai hian Barca fans-in inkhel an en meuh lo a, mipui nuai khat dawn punkhawmna ṭhinah mi 27,099 chiah awmin an manager Luis Enrique hming an sawi rik rualin mipuiin an lawm lohna an lantir zui!

Inkhel hi chu chak tur chiang sa a ni a, beisei ang result a ni. La Liga mawngphah Elche tan Barca khelmuala chak hi a beiseiawm lo a, si nga an phur. Goal thuntute kan en chuan Lionel Messi, Neymar, Luis Suarez leh Jordi Alba-te an ni a, a player ṭhate a khelhtir tih kan hmu.

Barca boss hian Real Sociedad khelmuala an inkhelh ṭumin a player ṭhate a 'khêk' a, Gerard Pique, Dani Alves, Ivan Rakitic, Neymar leh Messi-te'n inkhel bul an ṭan lo. Pathiannia La Liga inkhelah hian Barca hi an chak lo ta reng a, Messi leh an manager hi an inhnial buai niin an sawi a, Barca hotu zingah Enrique chhuahtir duhtu an pung zel.

Ninagani a ni a, Barca boss a inhmu­chhuak. Sociedad an hneh loh ṭuma a chawlhtir a player ṭhate chu an chak chianna tura nia lang inkhelah an zavaiin a luhtir leh lawi si. Nou Camp-ah Messi hoin Pique, Dani Alves, Ivan Rakitic leh Neymar-te'n inkhel bul an ṭan a, first half-ah Messi, Neymar leh Suarez-te'n goal an thun vek.

Enrique tana ngaih tiṭhalotu tur chu inkhelh hmaa team list an puan khan a ni. Inkhel en ṭhintu tam zawk an inlan lo a, tun season-a an tlem ber ṭum a ni phawt. Inkhel tur hming an chhiar chhuak a, Messi hming an chhiarin ring takin an au a, ani hi Sociedad an hneh loh ṭuma bench-a an dah vanga lungawi lo kha a ni. Chutah Enrique hming an lam ve leh a, mipuiin an duh lohzia lantirin châng an rum nasa mai.

Khelmual chhungah erawh Barca player ṭhate'n an ze ngai an chhuah a, a bikin Suarez a langsar. Uruguyan striker hian Neymar-a tan goal hmahruai a siamsak a, goal hnihna a thun zui bawk. Barca hi kawng tinrengah an chungnung a, Neymar, Messi leh Suarez-te'n nuam an tawl a ni ber mai a, Elche goal hmaah ball a awm deuh reng.

Buaina a fel em?

Messi hi tun hnaia a inkhelh loh vanga lungawi lo a ni lo a, boss tharin a enkawl danah a lawm lo niin an sawi. Player dangte pawh an lungawi vak lo a, Luis Enrique hian a naute a ho khawm ṭha thei lo a ang hle.

Media report-a a lan dan chuan Xavi leh player senior deuhte'n Messi hi an kawm a, boruak ṭha tak a awm theihna turin Nilaini khan an inhmukhawm. Barca player-te hian rawtna an neihte an boss bula an thlenin ngaihsak a hlawh ngai lo a, amahin thil engkim a kal tlangpui a, hei hi Messi leh a ṭhiante hian an ngai thei lo hle nia sawi a ni.

Messi hi player nungchang ṭha leh 'neuh neuh' nei lo anga sawi ni mah se, coach Pep Guardiola nen pawh khan an thu a inhmu lo tawh niin an sawi. Coach dangte chu an ngawi thei mai a, Barca player hlui ve tho Enrique hi pa rilru lian ve tak mai a ni a, Messi pawh bench-ah a dah hmak mai niin an la sawi zel!

Hei hian nghawng lian tak a neih tak chu La Liga-a hma an hruai theihna hun ṭha an bawh pelh a, an chak lo. Enrique hian club mawina aiin ama ngaihdan a dah lian lutuk niin an sawi a, Barca hotu zingah Enrique hnawk titu an pung zel.

Messi nen hian training-naah na takin an inhnial a ni mai lo a, Thawhṭanni khan Barca captain Messi leh player ṭhenkhat an training lo nia sawi a ni. Hei mai hi a la ni lo, Messi hian ngaihbel turin social media site Instagram lamah an intihbuai hnu chiah hian Chelsea chu a lo zawm (follow) ve chiah bawk si a, Stamford Bridge leh Messi an sawi zawm ta hial a ni!