United-in De Gea dah ngheh tum

Manchester United-in Victor Valdes an lakluh avangin David de Gea chu chhuak mai tur anga sawi a tam hle mai a; nimahsela United chuan an keeper ṭha hi chelh belh an tum a, Valdes ngei pawhin De Gea pui tura Old Trafford-a kal a nih thu a sawi.

Valdes chuan, "Manchester United ka zawm thei hi ka lawm a, a chhuanawm ka ti," a ti a, thla 18 daih contract a ziah chu ṭha taka hman a tum thu a sawi. Hetihlai hian Barcelona keeper hlui hian United No. 1 chu De Gea a ni tih a pawm a, De Gea tichak tura lut a nih thu a sawi.

Valdes chuan, "Tunah hi chuan khawvela goalkeeper ṭha ber a niin ka hria. Nitina a che vel leh a inkhela a chet dan ka enin ani hi chu a level a sang takzet a ni. Kum ṭha tak a hmang a, tunah hi chuan khawvela goalkeeper ṭha berah kei chuan ka ngai," a ti.

World Cup leh Champions League-ah pawh lo champion tawh goalkeer tawnhriat ngah tak chuan, "Ka football khelh hun chhunga ka awm dan angin he hmunah pawh hian midangte pui tura lo kal ka ni. Ka teammate-te leh ka coach-te pui turin ka inkhel ṭhin a, harsatna thlentu nih ka duh lo a, team tichak tur leh pui tura lo kal ka ni," a ti.

Hetihlai hian De Gea agent Jorge Mendes chuan De Gea chu contract thar ziahpui thuai a tum niin an sawi a, Real Madrid leh club lian dangin an sawm hial hi Old Trafford-ah châm chhunzawm tir tumin an bei mek.