African Player of the Year Yaya Toure

A zawna a kum lina atan Manchester City-a khel mek Ivorian midfielder Yaya Toure chu African Player of the Year-ah thlan a ni.

Chawimawina dawng thei tur zingah hian Vincent Enyeama leh Pierre-Emerick Aubameyang-te pawh chhawp chhuah an ni a, Premier League-a Manchester City champion-puitu hi chawimawina dawng tura thlan a ni ta a ni.

He chawimawina hi Cameroon star Samuel Eto'o chuan vawi li a lo dawng tawh a, a kum zawnin a dawng lo a, Yaya Toure hi chu a kum zawna vawi li dawng thei hmasa ber a ni.

Kum 31 mi Yaya Toure hian season hmasa khan Premier League-ah Man City a champion-pui a, an player pawimawh ber a ni hial ang. Goal 20 a thun mai a ni lo a, goal pawimawh tak tak siamsaktu a ni.

Chawimawina dawng phak ta lo Aubameyang hian season hmasa khan Borussia Dortmund tan season hlawhtling tak a hmang a, Gabon international player hian Bundesliga lamah goal 13 a thun. Enyeama hi World Cup-a Nigeria captain kha a ni a, French league-a Lille kaihruaitu pawimawh tak a ni bawk.

A tirah player panga thlan chhuah an ni a, chutah chuan Ghana star Asamoah Gyan leh Nigerian player Ahmed Musa-te pawh an tel a; December-ah khan anni pahnih hi chhawk an ni a, a bang pathum aṭangin chawimawina dawngtu hi an thlang ta a ni.

Tu nge Yaya?

May 3, 1983-a Ivory Coars-a piang Yaya Toure hian an ramah football khelh a zir ṭan a, Belgium lamah zir chhunzawmin Europe-ah hmun hrang hrangah a khel a, tunah chuan khawvel player ṭha zinga chhiar tel a ni ta.

Man City player hi 'all rounder' a ni ber mai a, a tleirawllai chuan striker angin a khel ṭha a, chumi hnuah central defender angin an chhawr leh a, 2009 UEFA Champions League final pawh khan Barcelona tan central defender angin a khel a, a position tak chu midfielder a ni.

Tunlai khawvela 'box-to-box player' ṭha ber pawla ngaih a ni a, anmahni lam penalty area (penalty box) leh an khingpuite penalty area hi a thleng tawn zak zak a ni ber mai.

Ivorian club ASEC Mimosas lamah kum 18 mi niin professional football nun bul a ṭan a, Belgium-ah Beveren lamah pêmin a intuai hriam. Arsenal-a khelh duhin kum 2003 khan a trial a, pre-season friendly match-a Arsenal leh Barnet inkhelh ṭum pawhin Arsenal tan a khel a; nimahsela a che ṭha tawk lo. Arsene Wenger-a'n lakluh duh tho mah se work permit a fel theih loh avangin kum 2003-ah hian Ukrainian club Metalurh Donetsk a zawm.

Kum 2005-ah Olympiacos-ah a kal a, Greek league-ah a chet ṭhat avangin sawmtu a nei nual. 2006 World Cup-ah an ram tan a khel ṭha bawk a, French club AS Monaco chuan World Cup zawhah an lei a, he ta ṭang hian kum 2007-ah Barcelona chuan pound maktaduai 6.7 velin an lei.

Barca-ah hian an player rinrawl ni phak lo mah se player ṭangkai tak a ni a, 2007-2010 chhungin game 74 a khel a, La Liga-ah vawi hnih a champion a, Champions League, UEFA Super Cup, FIFA Club World Cup leh King's Cup-ah vawi khat ṭheuh a champion.

July 2, 2010 khan City-in an lalut a, kum nga khel turin a tirah contract a ziak. City player pawimawh a ni nghal a, tun rei lo te chhungin Premier league-ah vawi hnih a champion-pui a, FA Cup leh League Cup-ah vawi khat ve ve a champion tawh bawk.

African Footballer of the Year-ah a zawnin vawi li - 2011, 2012, 2013, 2014 - an thlang a, hei hi City a zawm hnuah vek a ni a, hei hian Manchester City-a a ṭangkaizia a nemnghet awm e.