Real Madrid an tho leh ta Player 10-in Espanyol 3-0 in an hneh

FIFA Club World Cup leh UEFA Champions League champion Real Madrid-in a zawna vawi hnih chak loh an duhtawk viau. Inrinni zan khan Real hian James Rodriguez, Gareth Bale leh substitute Nacho Fernandez te goal hmangin Espanyol 3-0 in an hneh.

Portuguese defender Fabio Coentrao chu second half ṭan tirah hnawhchhuah ni mah se Real Madrid an talbuai phah lo - point 42 hmuin La Liga hmahruaitu an ni a, khelh zat inangah nizana inkhel Barcelona leh Atletico Madrid aiin point liin an sang.

Inkhel chu

Santiago Bernabeu-ah khelmual neitu Real Madrid-in bul an ṭan ṭha a, minute 10 pawh an la khelh tlin hmain Karim Benzema-a'n goal ban a pet per nghal. Goal luh nan hun rei an mamawh lo a, minute 12-naah FIFA Ballon d'Or nominee nominee Cristiano Ronaldo pass chu James-a'n goal-ah a chantir a, 1-0 a ni.

Goal luh aṭanga minute li hnuah defender Raphael Varane-a'n a chance ṭha neih chu goal zawnah a tauh thei lo a, goal hnihna erawh a lut thuai thung. Minute 28-naah yard 30 aṭangin Bale-a'n freekick aṭangin a khung a, Espanyol keeper Kiko Casilla tan dan theih a ni lo.

Second half-ah erawh Real-in bul an ṭan ṭha lo a, wing back Coentrao leh Espanyol midfielder Jose Cana te an intauh a, referee-in mak tak maiin Portuguese defender hi a hnawhchhuak. Real boss Carlo Ancelotti-a'n point thum hlawhchhuah a duh a, James aiah defender Nacho a luhtir nghal.

Espanyol-in an tam zawkna an hmang ṭangkai thei lo a, player 10-a khel Real Madrid an chungnung zawk a; Ronaldo-a'n Real goal thumna a khung teuh hle. Minute 76-naah goal kan hmu leh a, Alvaro Arbeloa cross chu Nacho-a'n half volley hmangin Real goal thumna a khung. Goal dang a luh belh tawh lo - Real Madrid 3-0 in an chak.

Chhan ngai Bale

Khawvel player manto ber Gareth Bale-a'n freekick aṭangin goal a khung a, mipuiin an lawm. Amaherawhchu, second half-ah Ronaldo pass mai loin amaha tih-goal a tum a, a tihsual avangin mipuiin an dem - an au-el.

Real boss Carlo Ancelotti chuan, "Gareth khan ṭha takin a khel a ni. Goal a khung vangin mipuiin an lawm a, a hnu lehah kha chuan Ronaldo pass turin an duh a ni. Football-ah chuan midang tana khelh a pawimawh a, mahni hmasial an awm a nih chuan kan siam ṭha ang. Player ṭha bikah chuan mipui beiseina a sang a, Bale hi chungtiang player chu a ni. Kan khelh hi football a ni a, engpawh a thleng thei. Bale leh Ronaldo inkar bakah team pumpui boruak a ṭha. Real hian tum pakhat kan nei a, chu chu Madrid hi a chung bera awm tir a ni. A bak han sawi zui tur a awm lo," tiin Welsh forward a chhan.

Ancelotti chuan sawi chhunzawmin, "Coentrao hnawhchhuah a nih dan kha ka hrethiam lo, thutlukna mak tak a ni. Tlem zawk ni chunga khelh hi a harsa a, tun ṭumah erawh player 10-in kan khel ṭha viauin ka hria," tiin a sawi.

Espanyol boss Sergio chuan, "Goal thum chhuah chuan a lawm theih loh. Theihtawp chhuah mah ila Madrid kha an chungnung zawk a ni. Tuna kan result hi kan theihnghilh a, Valencia nena kan inkhelh tur kan ngaihven a ṭul. Uluk takin kan khelh dan kan zir let ang a, starting eleven tur pawh chumi aṭang chuan thutlukna kan siam ang," tiin a sawi.