Valencia leh Celta Vigo te'n point an insem

Inrinni zan La Liga inkhel-ah Valencia leh Celta Vigo te goal khat ve ve khungin an inhnehtawk a, hetiang zat bawk hian Malaga leh Villareal te an inhnehtawk bawk. Inkhel dangah Eibar an chak a, Getafe 2-1 in an hneh.

Balaidos-ah mualneitu Celta Vigo an langsar hmasa a, Valencia tlar hnung an talbuai. Charles-a'n Nicolas Otamendi lakah penalty a chawi a, penalty hlawhchhuaktu hian pet nghalin a khung lo. Celta Vigo hian first half-ah an chance neih an khung lo a, Valencia erawhin an khung thung. Minute 43-naah Rodrigo-a'n a khung a, Celta Vigo keeper Sergio-a'n a hna tlin tawk lo.

Second half-ah ṭan tirhah Celta Vigo-in inkhel an thunun chhunzawm a, goal an neih phah bawk. Corner kick aṭanga ball kal chu Valencia tlar hnungin an clear thei lo a, minute 61-naah Otamendi-a'n a pet goal.

Hun tawp lamah Valencia an chungnung a, goal erawh an khung belh tawh lo.

Estadio La Rosaleda-ah mualneitu Malaga-in chance an nei hmasa zawk a, midfielder Nordin Amrabat ball pet chu a hlauawm nghal. Villareal pawhin goal khung theihna tur an nei a, Ikechukwu Uche cross chu Denis Cheryshev-a'n goal zawnah a tauh thei lo.

Uche hian defender Bruno Soriano a bum hnuah goal zawnah pet mah se keeper Carlos Kameni-a'n a dan sak. Villareal-in first half tawp hma hretin goal an khung hram a, Jonathan Dos Santos hmangin 1-0 in hma an hruai.

Second half ṭan tirhah Sergi Darder hmangin Malaga-in an siphurh a, Amrabat offiside vangin pawm a ni lo. Referee thutlukna zira offisde hi pek loh theih a ni. Minute 60-naah Villareal player penalty area-ah a handball a, Amrabat-a'n an siphurh sut nan hmang.

1-1 a nih hnuah Villareal goal khung pawm a ni lo a, Uche-a'n chance ṭha a hlah bawk avangin team pahnihin an inhnehtawk.

Municipal de Ipurua-ah mualneitu Eibar-in hun chanve hma lam leh hnu lama Manu del Moral leh Ander Capa te goal khung hmangin 2-0 in hma an hruai a, hun tawp lamah erawh an talbuai. Hun tawp lamah Getafe-in goal an khung a, minute 80-naah Diego Castro-a'n mikhual team tan a khung. A tawp thlengin an siphurh sut tumin an nawr a, Eibar an him hram.