PSG an tawlhthlu; Blanc a thinrim

Paris Saint-Germain-in Bastia laka goal hnih an khung hnuah goal li an chhuah a, 4-2 in an chak lo. PSG hian Ligue 1 hmahruaitu Marseille hmuh zat point 41 hmu thei mah se an chetsual avangin palinaah an awm a, an chungah Lyon leh Saint-Etienne te an awm.

Paris-a Charlie Hebdo chanchinbu office beihnaa mi 12 thihna sun nan Ligue 1 player-te'n armband dum an hreng.

PSG goal bawh a na nghal a, Lucas Moura-a'n minute 10-naah goal hmahruai a khung nghal. Brazilian forward hian Yohan Cabaye ball pass ṭha tak chu la thlain Florian Marange a bum hnuah keeper Alphonse Areola a pet khum.

Zlatan Ibrahimovic pass chu goal hmahruai khungtu Moura hian goal zawnah a pet thei lo a, goal hnihna erawh a lut thuai tho. Minute 20-naah Blaise Matuidi leh Maxwell te thawhrah sengin Adrien Rabiot-a'n goal hnihna a khung a, chak turin mikhual team dinhmun a ṭha hle.

PSG-in inkhel thunun mah se Van der Wiel handball vangin penalty an chawi a, minute 32-naah cool takin Ryad Boudebouz-a'n a khung. First half tawp hma ṭepin Bastia-in corner an hmu a, PSG defender pathumin an clear theih loh hnuah changtu nei lo Francois Modesto-a'n a tauh lut a. First half-ah 2-2 a ni.

Halftime-ah PSG lamin thuṭha an dawng a, second half-ah goal khung tumin an rawn khel nghal a. Yard 20-na aṭanga Ibrahimovic freekick chu keeper Areola-a'n a dang ṭha hle.

PSG-in goal an khung thei mai lo a, minute 56-naah Julian Palmieri-a'n box pawn chiah aṭangin nalh zetin a volley goal a, November 2012 hnua a goal khung lehna hmasa ber hi Bastia tal goal pawimawh a ni.

Minute 21 chiah a awm tihin PSG defender Thiago Silva-a'n crossbar a tauh per a, an beiseina erawh Palmieri-a'n a ti thamral. Minute 89-naah Abdoulaye Keita cross chu Palmieri hian a tauh lut a, Bastia 4-2 in an chak.

PSG coach Laurent Blanc chuan, "Ṭha takin bul kan ṭan a, goal hnih kan khung hmasa a. Hemi hnua Bastia laka goal li kan chhuah hi hriat thiam theih a ni lo. Kan tihsual vang liau liau a chak lo kan ni. Bastia leh an mipui kha keimahni tih phur a ni a, kan ngaih a ṭha hma mah mah bawk. Kan tihsual bakah kan vanduai tel a, tun hi inzirna tur ṭha tak a ni," tiin a sawi.

Inkhel Results

Bastia 4 - 2 PSG

Evian TG 1 - 1 Rennes

Guingamp 2 - 0 Lens

Lille 1 - 0 Caen

Nice 3 - 1 Lorient

Reims 1 - 2 Saint-Etienne