Milan an chak zo lo leh tawh

Kum 2015-ah AC Milan an che fuh thei lo. Kum thara an game hmasa berah Sassuolo an hneh lo a, Inrinni zan khan Torino nen 1-1 in an inhnehtawk.

San Siro-a an mualpho hnuah Milan-in chak ngei an tum a, Torino hmachhawn turin match hmasa lama hrem vanga khel thei lo Philippe Mexes, Nigel de Jong leh Pablo Armero te an hmang thei a. Bench-ah Stephan El Shaarawy leh Torino star hlui Alessio Cerci te an ṭhuttir a, kum khat leh a chanve Serie A-a starting eleven chang tawh lo M’Baye Niang a inlan bawk.

Torino-in Amauri leh Paulo Vitor Barreto te an chhawr thei lo a, November 2001 khan Milan 1-0 in an hneh a, tun a Milan boss Pippo Inzaghi hian penalty a hlah. Hemi hnu hian Torino hian Milan hi an hneh leh tawh lo.

Inkhel an ṭan chiah a, Jeremy Menez-a'n player pathum a bum hnuah Torino defender Kamil Glik lakah penalty a hlawhchhuak. French midfielder hian minute hnihna lekah penalty hi goal-ah a chantir nghal.

Torino an mualah an zam mai lo, Alexander Farnerud ball pet kawh tak chu keeper Diego Lopez-a'n a dan sak a. Hemi hnu hian Farnerud pass chu Fabio Quagliarella-a'n hnai tak aṭangin keeper ke a pet per.

Corner kick aṭanga Torino defender Emiliano Moretti ball tauh chu Alessandro Gazzi-a'n khawih hman mah se goal zawnah a kal lo a; Italian winger Matteo Darmian-a'n crossbar a tauh per bawk. First half-ah Milan an him hram a, defender Mattia De Sciglio erawh injury time-ah Darmian pawh tluk vangin hnawhchhuah a ni.

Second half ṭan tirhah Milan midfielder Sulley Muntari chuan yellow card a chawi nghal a, a hmuh belh leh hlauin a aiah Andrea Poli luh tir a ni.

Torino-in ikhel an thunun chhunzawm a, goal khung theihna chance pawh an nei. Gazzi volley ṭha tak chu keeper Lopez-a'n a dan sak a, Milan goal veng hian Quagliarella leh Marco Benassi te goal khung tur a dan sak bawk.

A tawpah Milan vanneihna in a daih tawh bik lo a, hun tawp hma minute kuaah corner aṭangin Glik-a'n an siphurh sutna goal a tauh lut. Hei hi tun season-a Torino defender Glik-a goal ngana a ni a, Milan-in corner aṭanga goal riat an chhuahna a ni bawk.

Torino an che ṭha tluan a, Josef Martinez goal khung tur chu Milan defender Adil Rami-a'n a dan sak a. Milan an vannei a, goal dang chhuah belh tawh loin 1-1 in inkhel a tawp.

Milan boss Pippo Inzaghi chuan, "11 leh 11 chuan khel ila kha ai chuan kan khel ṭha thei ang. Player 10 ni chungin kan dang ṭha viau a, amaherawhchu corner aṭangin goal kan chhuah. Corner ven dan hi kan zir ṭhat leh a ṭul a ni," tiin a sawi.

Serie A hi tun hnaiah a tla hniam a, Champions League-ah club pathum tan chiah hmun a awm. Milan manager hian season ṭan tirhah Champions League khelh a beisei thu a sawi. Hemi chungchang zawhna chhangin Inzaghi chuan, "Champions League chungchang hi chu kan tan sawi tawh lo a ṭha zawk. Kan inkhelh leh tur chiah kan ngaihtuah a ṭul a, hmasawn tur chuan team rilru put hmang kan thlak a ṭul a ni. Goal kan khung hmasak hnuah concentration kan hloh ṭhin a, kan tawrh phah zel zawng a nih hi. Tun season hi a harsa dawn tih ka hre sa a, ka inkhelh chhung zawng khan ka hnathawh chiah ka ngaihtuah a, coach ka nih hnuah pawh a danglam lo. Kan player-te hian inrintawkna kan neih a ṭul a, tunah chuan an zam rih a ni," tiin a sawi.

Serie A inkhel dangah Sassuolo leh Udinese an inhnehtawk. Minute 15-naa Sassuolo tana Simone Zaza goal khung chu Udinese-in minute 11 hnuah Cyril Thereau hmangin an sut a, goal dang luh belh loin 1-1 in an inhnehtawk.

Udinese manager Andrea Stramaccioni chuan, "Lai taka thlir chuan draw result kha a awm viauin ka hria. Milan hneh hnuah Sassuolo an phur a, keini erawh inhliam vangin kan buai a, bench aṭanga lut tur player ṭha ka nei lo a ni," tiin a sawi.