Chelsea-in hma an hruai

Premier League inûm a hmuhnawm zel a, Chelsea-in hma an hruai leh ta. Inrinni khan Stamford Bridge-a an mikhual Newcastle United 2-0 in an hneh a, tun season-a an mikhualte an la hneh fai vek a ni.

Chelsea chak zanah Manchester City-te an in-draw avangin Chelsea hian point hnihin hma an hruai a, he inkhel pawimawh takah hian Oscar leh Diego Costa-te'n goal an thun. Khelh 21-ah point 49 an hmu ta a, City-in 47 an hmu.

Inkhel hmuhnawm chu

Season bul ṭan ṭha pahnih, tun hnaia khel ṭha vak lo pahnih inkhel a ni. Chelsea hi Man City-in an umphak chiah a; Newcastle hi an manager Alan Pardew a chhuah tak avangin caretaker boss John Carver hnuaiah an khel.

First half-ah mikhual team an che ṭha a, tun hnaia Southampton laka chak zo lo leh Tottenham laka mualpho Chelsea tlar hnung a nghing fo mai. Newcastle player Remy Cabella a khel ṭha a, Moussa Sissoko chuan goal ban a tihper bakah Thibaut Courtois aia lut Petr Cech chuan ṭha zetin ṭum khat a dang.

Half time dawnah Chelsea-in goal an thun a, Willian-a'n an khingpuite inrin hmaa corner a pet thut chu Branislav Ivanovic chuan Oscar-a tan goal thun tur a siamsak a, minute 43-ah 1-0 a ni.

Second half-ah Newcastle lam an 'come back' thei tawh lo a, player leh tawnhriat nei ṭha zawk Chelsea an hlauhawm tawlh tawlh a, minute 59-naah Costa chuan tun season Premier League-a a goal 15-na 'cool' takin a thun.

Chelsea zawkin thun belhna remchang an neih an hmang ṭangkai lo a, Newcastle-in an ngam tawh lo. Newcastle-in an manager ṭha Pardew an chhuahtir hi an tuar dawn niin a lang a, Burnley an draw a, FA Cup aṭangin an tla a, tunah an chak lo leh bawk.

Hetihlai hian Pardew hian a club thar Crystal Palace chu a mawng pathum aṭangin a tâl chhuahpui nghal der mai!

Chelsea leh a chhehvel

Team tinin khelh chhiatlai hi an nei ṭhin. Chelsea hian tun hnaiah point an hloh nual a, tun season-a an chet chhiatlai ber a ni. Inrinni inkhelah pawh bul an ṭan ṭha lem lo a, goal chhuah loa half time an thleng kha an vannei a ni.

Chutihlaiin he Chelsea team hi team ṭha an nihzia tilang turin goal khat an thun hnuah an khauh sawt a, na taka nawr lêt tumtu Newcastle lamin an phur belh teuh ṭhin hle. Chelsea hian season hmasaa an neih loh an nei ta a, chu chu 'regular' taka goal thun thei striker a ni a, Costa an nei tawh.

Spain aṭanga an lakluh Costa leh Cesc Fabregas-te hi an dam ṭhat phawt chuan season tawpa a chung bera an awm a nih pawhin a mak lo a; nimahsela Chelsea 'meuh' pawh an talbuai thei a ni tih krismas ruai ṭhehlai velin kan hmu.

Stamford Bridge-ah a zawnin game 10 an chak thei hi a pawimawh a, khelmual dangah talbuai ve deuh mah se anmahni khelmuala an chak zel avangin a tak takah chuan 'chet chhiat lai' pawh an nei mang lo chu a ni a, season tawpah an ṭangkaipui thei ang.

Eng nge an sawi?

Inkhelh banah Jose Mourinho a inlan lo a, Chelsea assistant coach Steve Holland zawk kan hmu. Holland chuan hmasawnna a hmuh thu sawiin, "Jose-a'n player-te nasa takin a fuih a, an tih tur uluk takin a hrilh a, chu chu a takin kan hmu. Khelmualah na zawka nawr turin a fuih a, goal thun tuma nasa zawka nawr turin player tinte a fuih a, chu chu kan inkhelah kan hmu," a ti.

An inkhel a thlir a, "Second half-ah khan kan khel ṭha a, first half erawh kan duh angin kan khel thei lo. Khel ṭha tawk lo chunga half time-a 1-0 a ni thei khan min tilawm a ni," tiin a sawi.

Hetihlai hian Newcastle enkawl lailawktu Carver chuan, "Kan tihsuala inzir lo ang mai kan ni. Kar hmasa khan Leicester lakah short corner aṭangin goal kan chhuah a, a video-te enin nasa takin kan inzir a, a ngai bawkin goal kan chhuah leh... Krismas laiin inkhelh a tam a, inzirna hun kan nei a, ka duh angin team ka la enkawl hman lo a ni e," a ti.