Liverpool an insiam ṭha mek
Hman ni lawka Champions League beisei phak tawh lo tura ngaih Liverpool chuan zawi zawiin hma an sawn mek zel a, Champions League beiseina nen season an hmang chho leh ngei dawn niin a lang - Sunderland 1-0 in an hneh a, point 32 an hmu ta.
Stadium of Light-a inkhelah Liverpool hian minute riatnaa Lazar Markovic goal an chakpui a, tun hnai game li chhunga an vawi thum chakna a ni. Inrinnia inkhelah hian Steven Gerrard chu inhliam vanga lak chhuah a ni a, Sunderland player Liam Bridcutt chu yellow card vawi hnih a hmuh vangin hnawhchhuah a ni bawk.
Liverpool hi an chak a ni mai lo a, goal an chhuah lo. Tun hnaia an game 37-ah Liverpool hian goal chhuah loh ṭum ruk chiah an la nei a, Inrinnia goal an chhuah lo hi an tan chuan thil lawmawm a ni.
Liverpool manager Brendan Rodgers chuan, "Goal kan thun belh thei lo kha ka lawm lohna awm chhun a ni a, kan inkhel ka thlir khan kan che ṭha a, kan thunun hneh hle a ni. Kan goal nawr kha a na em em a, penalty tur min pe lo erawh a pawi," tiin a sawi a; captain Gerrard chuan a malpui thâ a tina tih a sawi a, ngaihtuahawm tur a ni lo ang.
Palace an chak e
Inrinni zan Premier League-ah tun hnaia che ṭha Tottenham chu tun hnaia che chhia Palace chuan 2-1 in an hneh a, Palace hi a hniam pathum aṭangin an tâl chhuak.
Manager thar Alan Pardew hnuaia Premier League game hmasa berah hian mikhual Tottenham-in goal an thun hmasa a, tun hnaia dan theih loh Harry Kane chuan second half ṭan hnu lawkah goal a thun. Chelsea an hneh ṭuma player pawimawh Kane hian Tottenham a zawm hnuah goal 18 a thun der tawh.
Minute 69-naah mual neitu lamin an sût a, Dwight Gayle chuan Joe Ledley penalty hlawh chhuah a thun a; minute 80-naah Jason Puncheon chuan a ke veilamin an chakna goal a thun ta a, tun hnai game riat chhunga an chak vawi khatna a ni a, fans an lawm ngei mai.