Vawiinah MPL Under 17

Mizoram Premier League season 3 Under 17 chu vawiin hian Lammualah khelh ṭan a ni dawn a, Chanmari West FC leh Mizoram Police FC-te'n an khel ṭan ang.

MPL Under 17-ah hian MPL club pariatte tel vek tura tih ni mah se, Lunglei FC an inlan theih dawn loh avangin group A-ah team pathum chiah an awm dawn ta a; Lunglei FC hian harsatna an tawh avanga an khelh theih loh tur thu an sawi a, an chungchang hi MPL Board-in a la ngaihtuah zui ang.

Under 17 hmuhnawm kum

Tun season MPL Under 17 hi kum dang aia hmuhnawm tura ngaih a ni a, a chhan chu registration dan thar hman vang a ni. MPL-1 leh MPL-2 lamah chuan Under 17-a inkhel tura inziak lut bik liau liau chiah khelhtir phal an ni. MPL-3 ah erawh chuan club danga registration neite pawh, kum 17 hnuai lama an niha MPL club lamin an team-a khel tura an duh a nih chuan an ziak lut thei a, hei vang hian talent ṭha zawk kan hmuh ngei a beiseiawm.

MPL Under 17-ah hian a hranpain prize money siam a ni ngei lo a, club tinte inbuatsaihna tur sum leh pai bakah inkhelh apiangin 'match money' pek an ni ṭhin thung a ni.