Man City-in point hnih an hloh

Champion tuma inûm boruak a san vanglai takin Manchester City an tawlhthlu hmasa zawk a, Chelsea chak zanah point hnih an hloh - Everton khelmualah 1-1 in an inhnehtawk.

Hetihlai hian Liverpool chu point thum hmu turin Sunderland khelmualah 1-0 in an chak a, Burnley, Leicester, West Brom leh Crystal Palace an chak a, Swansea leh an mikhual West Ham United 1-1 in an inhnehtawk.

City an buai e

Sergio Aguero lo kirna inkhelah Man City-in point khat bak an hawn thei lo. Goodison Park-ah Everton an khel ṭha a, minute 74-naah mikhual tan Fernandinho chuan goal thun mah se, Steven Naismith chuan minute li hnuah a sût zui nghal a, City zawkin an phurh belh teuh ngei mai.

Everton hi tun hnaia a zawna vawi li chak lo tawh an ni. Roberto Martinez-a hotute hi an khel chhe em em pawh a ni lo a, an vanduai a, an chak thei lo a, an chak lo fo a, fans lam pawhin an sawisel nasa tawh hle.

Everton hian a tir aṭangin chak tumin an nawr a, City lamah Africa Cup Of Nations khel tura kal Yaya Toure leh 100%-a fit lo Vincent Kompany-te an awm lo a, hei vang hian Romelu Lukaku chu a langsar a, a tharum ngah a chhawr thiam hle.

City-in inkhel thunun zawk mah se an goal bawh a na lo a, first half-ah goal a awm lo a, Everton tan Seamus Coleman chuan goal bar a tihper. Second half-ah City hian goal an thun hmasa a, counter attack-a rang taka an nawr phei chu David Silva pet an dan per chhawrtu Fer­nandinho chuan a tauh goal.

City hian hma an hruai rei lo a, Leighton Baines-a freekick chu Joe Hart-a'n a khawih hman hmain Naismith chuan a tauh goal. Second half-a lut Aguero pawhin goal hlauhawm a nei thei tawh bik lo a, point khat ve ve an hmu ta a ni.

Eng nge an sawi?

City boss Manuel Pellegrini chuan an goal thun loh chu pawi a ti a, "First half-ah khan inkhel kan thunun hneh hle a, kan chance neih kan thun si loh chuan a harsa a ni e. First half-ah khan inkhel tidanglam thei kan ni a, kan chhawr ṭangkai ta si lo a ni," a ti.

Real Madrid boss hlui ni bawk chuan champion tura inûm an la bei dawn chauh tih pawmin, "Tun aṭanga seson tawp thlengin team tinin point kan la hloh vek dawn a ni," a ti a, an chunga awm Chelsea pawh an la chak loh ve tho a ring.

Aguero a dam leh ta chu a lawm a, "Ni hnih ni thum bak a la training hman lo a, tunah chuan kar khat vel inbuatsaihna hun kan nei dawn a, ani hi kan mamawh a ni," a ti a, City hian Wilfred Bony pawh an neih beih ngei a rinawm.

Everton boss Roberto Martinez chuan he result hi an insiam ṭhat bulṭanna a nih a beisei thu a sawi a, an striker Lukaku chu 100%-a a fit tawh avangin a tharum leh thiamna an chhawr ṭangkai dawn chauha a rin thu a sawi lang.