Aw nang Yamal, i naupanna tumahin ngainêp suh se!

Kum 16 chauh a la ni a, puitling rual, khawvel huap pawha player langsar ber ber kara langsar ber erawh a ni lawi si - a hming chu Lamine Yamal a ni a, khawvel team ṭha France chu an puanthuah a tel tir leh ta!

Thawhlehni zan khan Euro 2024 semifinal-ah Spain-in 2-1 in France an hneh a, Luis de La Fuente enkawl team hmuhnawm hian Euro final an lut - an phu takzet.

France tan Randal Kolo Muani chuan minute riatna lekah goal hmahruai a khung a, La Roja a barakhaih. Mahse, Spain an hnufum rei lo - Lamine Yamal leh Dani Olmo ten an chhanglet vat a, 2-1 in an chak daih.

Nizan khan semifinal inkhel dangah Netherlands leh England an inhmachhawn a, he thu buatsaih a nih lai hian result kan hre hman lo. Euro final hi July 14, Pathianni zanah khelh a ni ang.

Barakhaih

France-in semifinal hial lut mah se, beisei angin Euro an hmang lo a, Spain an hmachhawn hma hian open play aṭanga goal khung an nei miah lo - an buaina langsar chu Antoine Griezmann a ni a, Atletico Madrid forward hian beisei a phak lo.

Hei vang hian Spain hmachhawn dawnah Didier Deschamps-a'n thutlukna huaisen a siam a, bench lamah tawnhriat nei ṭha Griezmann hi dahin, 4-3-3 formation nen Spain a hmachhawn a, a tifuh dawn niin a lang hman.

Minute riatna lekah Les Bleus hian goal an khung nghal a, Griezmann aia lut Ousmane Dembele ke aṭanga chhuak a ni - a ball thlawh luh chu Kylian Mbappe ke bulah a tla a, Real Madrid forward hian Kolo Muani tana tauh nuam tawkin a thlawh lut.

Allianz Arena-a inkhelah Spain fans an hawihai a, an hlauthawng takzet. France-in beisei aia hmain goal an khung a, Deschamps-a naute hian invenhim ringawt an ngaihtuah zui chuan Spain tan a harsa thei dawn.

Fapa pekin kan awm ta!

France-in inkhel an thunun zui a, tun Euro-a a hnar ruh tliak vanga hmaikawr nena inkhel ṭhin Mbappe-a'n a hmaikawr a hlip tawh a, kum 25 mi France captain hi a che vel a hmuhnawm a, a hlauhawm ṭhin hle.

Mahse, La Roja fan-ten an hlauthawng a nih pawhin hlauthawng ve lo an awm a, chu chu Spain player-te an ni - goal an chhuah hnuah an thawkrim lehzual sawt a, goal an chhuah aṭanga minute 13 liam hnuah si phurh an sut.

Spain tan rawlthar duhawm Yamal a inlar. Kum 16 mi forward hian box pawnah duhthala France player-te a lam khum hnuin goal chung lam kil sirah a thlawh lut a, player naupang ke aṭanga chhuak awma mawi pawh a ni lo - a ropui lutuk mah mah!

Yamal hi kum 16 leh ni 362 mi niin, European Championship-a goal khung thei naupang ber record a siam nghal a, kum 18 leh ni 141 mi nia Swiss forward Johan Vonlanthen-a record lo siam tawh chu a khum - Vonlanthen-a goal khungna hi France tho an ni a, mahse, 3-1 in an chak lo thung.

A hmawr bawktu

France-in Spain an chhaih kawlh emaw tih mai tur a ni - si phurh an sut aṭanga minute li hnu lawkah Spain-in goal an khung lehnghal a, Dani Olmo shot chuan France defender Jules Kounde a per hnuah a lut.

Pedri hliam vanga lut Olmo hi Spain hian an ṭhatpui mah zawk em ni chu aw, tih mai tur a ni a, quarterfinal-ah khan Pedri thlakin, goal leh assist a lo nei tawh bawk - Spain squad chhahzia hrilhfiahna a ni.

Minute riatna leka hmahruaitu France kha minute 25 an thlen meuh chuan 2-1 in a hnufual zawk an ni leh der tawh a, chawlhlawk hman a nih hnuah Deschamps-a nauten nawr na hret mah se, Mbappe leh Theo Hernandez ten an chance neih an chhawr thei lo ve ve a, hun tawp thlenga goal dang lut tawh loin, 2-1 in Spain an chak.

Yamal hming lam nasat karah Spain tana Rodri ṭangkaina hmuh hmaih theih a ni lo a, Manchester City midfielder thluak ṭhatna leh thiamna chu Spain midfield khaidingtu a ni - Fabian Ruiz a la awm cheu bawk a, La Roja an hmuhnawm hle.

Mangṭha France

France-in Euro 2024 an mangṭha ta a, inelna ṭantira champion tura beisei ni mah se, an khelh dan en chuan semifinal an thleng ringawt pawh hi lawm tur an ni - group stage-ah vawi khat chiah chak chungin round of 16 an lut.

Round of 16-ah pawh 1-0 in Belgium an hneh hram a, quarterfinal-a Portugal pet chhuak turin penalty shootout nghah thlen an ngai bawk. Les Bleus hian goal li chiah an khung a, heng zinga goal hnih hi 'own goal' niin, goal khat chu penalty a ni.

France tan chhuanlam tur erawh a awm - an match hmasa berah hnar ruh tliak vangin Mbappe lakchhuah a ngai a, Real striker hi hmaikawr vuahin inlan zui thei mah se, dam ṭha pangngai ang a ni thei lo a, semifinal-a an zinkawng a tawp chhan langsar a ni.

Deschamps-a'n France a enkawl hnua an record erawh sawi nep theih a ni lo. World Cup vawi thum khelin, 2014-ah quarterfinal lutin, 2018-ah an champion a, 2022-ah final an lut leh ngat. Euro vawi thum khel tawhin, final, round of 16 leh semifinal chu an tawpna a ni a, Deschamps hoin Euro nomawi an la chawi lo.