Aizawl FC = Chawnpui FC

LZ Juice MPL11-ah Aizawl FC-in nimin khan an coach hlui B. Malsawmzuala enkawl Chawnpui FC an hmachhawn a, hnehna an chang thei lo. I League club hi si phurh suttu zawk an ni a, 1-1 in an inhnehtawk.

RG Stadium-a inkhelah Lalthanzuala (TZ-a) hmangin Chawnpuiin an khung hmasa a, Aizawl FC-in C. Lalhriatpuia hmangin si phurh an sut. Season liam taa semifinal lut zo lo I League club-in MPL11 bul an ṭan ṭha tawk lo.

Aizawl FC-in an player thar Sawma Tlangte an la chhawr lo a, chutihrualin C. Hriata thlawp turin mual sirah Lalbiakdika leh Augustine Lalrochana te an awm avangin goal bawh na tura ngaih an ni.

Mahse, Chawnpui zawkin bul an ṭan ṭha a, HPC Cup 2024 top scorer TZ-a'n MPL a khelh hmasak berah goal a khung nghal. Coach Sawmtea'n inkhelh hmain, "TZ-a hi a la ṭha dawn. Tunah pawh Mizo forward ṭha zinga mi a ni tawh," tiin Vanglaini a hrilh a, TZ-a'n goal hmangin a pu rinna a chhang nghal.

Goal luh hnuah erawh Aizawl FC an chungnung a, I League club hian chance ṭha nei mah se goal khung an harsat. Minute 69-naah Aizawl FC winger BD-a ball pet chu Chawnpui keeper Buanga'n dang perin Hriata'n chiang zetin a pet goal.

I League club khel ṭha chhunzawm mah se hun tawp lamah an tha an thlah. Chawnpuiin inkhel an khar ṭha zawk a, chak theihna hun ṭha pawh an nei. Laltluangliana cross chu Amosa Vanlalruata'n a pet fuh tawk lo a, goalkeeper Lalhriatpuia'n Aizawl FC a chhanhim.