Alcaraz hmachhawn tur Medvedev Number 1 Jannik Sinner a tla!

Wimbledon champion lai Carlos Alcaraz chuan semifinal-ah Daniil Medvedev a hmachhawn dawn, mipa world number 1 Jannik Sinner chu quarterfinal paltlang zo loin a zinkawng a tawp ve thung ta a ni.

Spanish tlangval Alcaraz hian Thawhlehni zan khan Tommy Paul chu 5-7, 6-4, 6-2, 6-2 in a hneh a, inkhel dangah Medvedev chuan harsa takin Sinner chu 6-7 (7-9), 6-4, 7-6 (7-4), 2-6, 6-3 in a lo hneh ve bawk.

Alcaraz a chak

Champion lai a ni a, kuminah pawh rinkai berte zinga mi a ni bawk - Alcaraz tan inelna tir lam awlsam vak lo mah se nghet takin a ding chhunzawm zel. Court One-ah inlanin, a khingpui Paul-a hi darkar thum leh minute 11 chhungin a hneh.

Spanish tlangval Alcaraz hi tennis player ni mah se football ngaina tak mai a ni a, quarterfinal an khelh lai pawh khan an ramin Euro semifinal an khelh chu a rilruah awm reng a, match khelh zawh thuai a châk phah a ni.

Kum 21 mi Alcaraz chuan, "A nihna tak sawi chuan match dang ai chuan ka rilru a hmanhmawh deuh, set khatna ka hloh hnu phei kha chuan a harsa ta deuh, a tawp ka khar fuh thei erawh ka lawm hle.

"Semifinal chu a harsa dawn, a chhan chu season hmasa pawh khan tun ang hunah bawk hian Daniil nen kan lo inhmachhawn tawh a, kuminah pawh a vannei zawk ka nih leh theih ngei chu ka beisei," tiin a sawi a, chak nawn a tum ruh hle.

Alcaraz hi a kum la naupang mah se US Open, French Open leh Wimbledon nomawi a nei tawh, major title palina a beisei mek a ni a, amah aia kum upa leh tawnhriat nei tam zawk lakah pawh nghet takin a ding thei ṭhin a ni.

Semifinal tur chungchang sawi zuiin Alcaraz chuan, "Daniil hi player ṭha tak a ni a, a bik takin kumin Wimbledon hi a khel ṭha. Sinner lakah match ṭha tak a khel thei a, chuvangin ani hneh tur chuan thapui ka thawh a ngai dawn, ka ṭhat dan bera ka khelh a ngai ang," a ti.

Sinner a tla

Australian Open 2024 champion a nih hnuah world number 1 a ni zui a, mahse Jannik Sinner tan duh zawng zawng neih nghal vek a rem bik lo, inkhel hmuhnawm leh inhnehtawk takah Italian tlangval hian Daniil Medvedev a ngam lo.

Player pahnih an inkhel tawk takzet; Centre Court-ah darkar li chhung inkhel hmuhnawm an chhawp chhuak. Tun hnai an intawn hnuhnung pangaah Sinner a chak vek a, tun ṭumah pawh rinkai zawk a ni, mahse tunah chuan Medvedev hun a thleng ve ta.

Russian tlangval Medvedev chuan, "Centre Court bikah chuan vawi hnih ka chakna chauh a ni, chuvangin ka tan chuan chanchin lawmawm a ni," a ti. Tun hmain Wimbledon khelhna pui berah hian second round-ah Alexandre Muller a lo hneh ve tawh bawk.

Seeded pangana Medvedev chuan sawi zawmin, "Jannik hi awlsam taka hneh ngawt theih a ni lo, chuvangin ka khel ṭha ve hle niah ka ngai. Damlohna vangin ngai a awh chiah lo a ni mai thei, mahse inkhel awlsam a ni chuang lo," tiin a sawi.

Kum 28 mi Medvedev hian US Open 2021 nomawi a chawi tawh a, Grand Slam dang pathumah erawh a la champion lo. Australian Open final vawi thum khel tawhin - Wimbledon bikah chuan a vawi khat nan final luh a beisei mek a, a kawng erawh a hautak dawn.

Chak lo zawk Sinner tan erawh hmabak a la tam, a kum rualpui leh hnaivai zingah player ṭha an awm avangin nomawi chawi tam tur leh number 1 ni rei tur chuan taksa bakah rilru a paukhauh lehzual a ngai dawn hle a ni.