Semifinal-ah Paolini a lut

Jasmine Paolini chuan Emma Navarro 6-2, 6-1 a hnehin Wimbledon quarterfinal a paltlang a, Italian hmeichhe zingah grass court inelna liana semifinal lut hmasa ber a ni hial.

Italian hmeichhiate hian Wimbledon khelh an harsat ṭhin, tun hmain Camila Giorgi (2018), Francesca Schiavone (2009), Silvia Farina Elia (2003) leh Laura Golarsa (1989) ten quarterfinal chu an lo thleng tawh, tunah Paolini a rawn dawk chhuak ta chiah.

Kum 28 mi Paolini chuan, "Naupang mai ka nih lai khan Center Court-ah hian Wimbledon final ka lo en tawh a, khami ṭum aṭang khan duhthusam ka nei ṭhin, chu ka duhthusam chu Wimbledon champion a ni.

"Tunah semifinal ka thleng a, ka tum ram thleng turin kawng dik ka zawh, hmabak erawh a la hautak chho dawn hle thung. Ka tumpui leh tur Donna Vekic hi player ṭha tak a nih avangin ka tan chuan a harsa dawn," a ti.

Hmeichhe singles quarterfinal inkhel dangah Donna Vekic chuan Lulu Sun chu 5-7, 6-4, 6-1 in a hneh. Croatian nula Vekic hian Grand Slam vawi 43 a hmachhawn tawhah a ṭum khat nan semifinal a lut ve ta chiah, a tan chanchin lawmawm bik a ni ngei ang.

World number 37 Vekic chuan, "Lulu Sun khan ka theihna sang ber hmawng chhuak thei turin min nawr lui a ni ber mai, a khel ṭhain min chhaih buai hneh hle. Lawm avangin ka mittui a tla a, hetianga khelh leh theih hi ka tum ang," a ti.