Euro - Goal khung thei naupangte!

Football khawvela ram leh ram inelna ngaihhlut hlawh Euro 2024 chu a hmawr bawk a hnai ta - July 14, Pathianni zanah final khelh a ni tawh dawn a, ennawm ropui tak chu a puanzar khar a ni tawh ang.

Euro 2024 semifinal hnuhnung zawk chu nizan khan khelh niin, an result kan hre hman lo. Semifinal hmasa zawk chu Thawhlehni zan khan khelh niin, Spain chuan 2-1 in France an hneh.

He inkhelah hian Lamine Yamal chuan goal khungin, Barcelona forward hian Euro-a goal khung thei naupang ber record a siam - European Championship-a kum naupang taka goal khung player tam zawk chu ropui takin an vul zui a, hriat zui hlawh loa thamral ta pawh an awm.

Tun inelnaah Yamal bakah Turkey rawlthar duhawm Arda Guler chuan goal a khung ve bawk a, Real Madrid player a ni. Club ang zawng pawhin season thar tingaihnawmtu an ni thei dawn - Lionel Messi vs Cristiano Ronaldo kan tih ṭhin kha season tharah Yamal vs Guler kan ti lo ang tih tu nge sawi thei?

1. A hming Yamal

Kum 16 leh ni 362 mi niin goal a khung a, Euro-ah ani aia goal khung thei naupang zawk an la awm lo. Euro-a inlan thei naupang ber leh assist nei thei naupang ber a ni bawk a, a che hlek a, record a siam zel a ni ber! Barcelona tan match 51 khel tawhin goal sarih a khung tawh a, assist vawi 10 a nei. Spanish Super Cup leh Copa del Rey-a goal khung thei naupang ber record a siam tawh a, Barca tana bul ṭan thei naupang ber a ni bawk.

2. Beisei phak lo Vonlanthen

Swiss footballer Johan Vonlanthen hian kum 18 leh ni 141 mi niin Euro-a goal khung thei naupang ber record a lo siam tawh a, Euro 2004-ah khan France lakah a khung. Mahse, an ram Switzerland hi 3-1 in an chak lo a, Vonlanthen pawhin beisei a phak zui lo. Ram tan match 40 khela goal sarih khungin, Serie A club Brescia-ah loan-in a khel zuai tih loh chu European top five league-ah a inlan lo.

3. Striker rothap Rooney

Euro 2004-ah khan England chuan 3-0 ngawtin Switzerland an sawp a, hetihlaia kum 18 leh ni 237 mi Wayne Rooney chuan Three Lions tan goal a khung. Manchester United legend sulhnu ziak dawn ila, a phek dang kan mamawh belh ang!

4. Ngaihlai Renato!

Euro 2016-ah Renato Sanches a inlan a, quarterfinal-a Poland nen hun pangngaia 1-1 a an inhnehtawk ṭumin Renato hian goal a khung a, kum 18 leh ni 317 mi a ni. Best Young Player atan thlan zui a ni a, mahse, a club thar Bayern Munich-ah thamral zuiin, Renato-a'n beisei a phak zui lo.

5. Hranghlui Stojkovic

Euro 1984 kha a ni tawh - Yugoslovia midfielder Dragan Stojkovic chuan France lakah goal khungin, kum 19 leh ni 108 mi a ni. Mahse, Les Bleus lakah hian 3-1 in an tlawm ta tho a, Stojkovic erawh player ropui tak ni zuiin, FIFA XI-ah pawh vawi hnih ngawt a lang.

6. Besieina nen Güler

Turkey-in rin loh takin Euro 2024-ah quarterfinal an thleng a, an beiseina kengtu chu Arda Guler a ni. Turkey-in 3-1 a Georgia an hneh ṭumin Guler hian goal a khung a, kum 19 leh ni 114 mi a ni. Güler hian season hmasa khan thawm nei hatin Real Madrid a zawm a, hliam vangin kan hmu tam lo. Mahse, heti chung hian match 12-ah goal ruk a khung a, Euro-ah a theihna tak tak kan hmu zui.

7. Ronaldo Ropuia

Football ngaina lo thleng pawha a zuna uai tirtu, footballer ropui bera tam takin an ngaih a ni a, Cristinao Ronaldo chanchin sawi tam a ngai lo. Euro 2004-ah khan a vawi khat nan a inlan ve a, kum 19 leh ni 128 mi niin Greece lakah goal a khung. Mahse, Portugal hi 2-1 in an chak lo.

8. Hungary star Bene

Hungarian player ropui zinga sawi hmaih ni ngai lo chu Ferenc Bene a ni. Euro 1964-ah khan kum 19 leh ni 183 mi lek niin goal a khung a, mahse, Spain lakah Hungary chu 2-1 in an tlawm tho. Bene hi World XI-ah vawi li ngawt a lang a, a club career-ah match 417 khelin goal 303 a khung.

9. Lungtileng Chivu

Romania sawi apianga rilrua lo lang ṭhin chu Cristian Chivu kha a ni. Euro 2000-ah khan England lakah goal a khung a, Three Lions hi 3-2 in an hneh - a goal khung lai hian kum 19 leh ni 238 mi lek a ni. Khatihlai khan Romanian defender hi Ajax tan a khel a, a hnuah AS Roma leh Inter Milan tan a khel leh bawk.

10. Kluivert kha!

Kum 19 leh ni 353 mi lek niin Patrick Kluivert-a'n Euro-a goal hmasa ber chu Euro 1996-ah khan a khung a, mahse, group stage match-ah an ram Netherlands chuan 4-1 in England an ngam lo. Kluivert hi hetihlai hian Ajax player a ni a, AC Milan, Barcelona, Newcastle United, Valencia, PSV Eindhoven leh Lille tan a khel zui a, ram tan match 79-ah goal 40 a khung.