Wales manager thar Bellamy

Wales-in manager thar atan Craig Bellamy an ruat a, kum 44 mi hian kum li daih contract a ziak. Bellamy hian June thlaa Wales-in an ban Robert Page a thlak dawn.

Cardiff-a piang Bellamy hian Wales tan match 78 a khel a, kum 2007-2010 chhung khan captain hna a chelh. Bellamy chuan, "Ram enkawl tura min rin ngam hi kan tan chuan chawimawina a tling a, football-a ka hun tawn zingah ka ngaihhlut ber zinga mi a ni," tiin a sawi.

Bellamy hi a inkhelh hun laiin forward a ni a, English club ṭha Newcastle United, Liverpool, West Ham United leh Manchester City te tan khel tawhin Cardiff City-ah a hun tawp a hmang.

Football khelh a chawlhsan hnuah Bellamy hian Anderlecht Under 21 a enkawl tawh a, City tana a khelhpui ṭhin Vincent Kompany hnuaiah assisant coach hna a thawk zui. Rilru lam harsatna avangin September 2021 khan chawl lailawk mah se Kompany-a'n July 2022-a Burnley a enkawl ṭan khan coaching staff-ah tel leh a ni.

Kumin May 30-a Kompany-a'n Bayern a pan tur thu a tihchian khan Bellamy hi Burnley-ah head coach lailawk atan ruat a ni a, Clarets-ah thuneihna tak tak a chelh hmain Wales head coach atan ruat a ni.