Everton-in Man United dilna an hnawl

Manchester United-in defender Jarrad Branthwaite lakluh tumin £45m-in Everton dil mah se Toffees-in an pawm lo. Tun ṭum hi Man United-in Branthwaite chungchangah Everton hi ṭum hnih an dawrna a ni tawh a, thla liam ta khan £35m-a lei an dilna chu hnawl a ni tawh bawk.

Kum 22 mi Branthwaite hi centre back vei lama ding ṭhin a ni a, season liam ta khan Merseyside club tan khan league match 35 khelin a che ṭha a, defender nichungin goal thum a khung.

Season liam ta khan Everton hi ṭum hnih hrem an ni a, point 10 ngawt paihsak an ni chunga Premier League khel zel tura harsatna hranpa tawk loa an him theih chhanah Branthwaite hi a pawimawh.

Man United hian tawnhriat nei ṭha Raphael Varane contract thar an ziahpui lo a, tun thlengin Northern Ireland centre back Jonny Evans contract an la pawtsei lo bawk. Sweden international Victor Lindelof pawhin Carrington-ah training zawm leh tawh mah se a hmalam hun a chiang lo.

Erik Ten Hag-a hote hian tlarhnung tih phui tumin defender an zawng a, Bayern Munich defender Matthijs de Ligt nen pawh an indawr mek. Hei chauh hi a lo, khawtlang media te chuan Man United hi defender Leny Yoro chungchangah Lille nen inremna an nei niin an ziak bawk.

Mahse, kum 18 mi Yoro duh ber chu Real Madrid zawm a ni a, Old Trafford a pan kher dawn tihna a ni lo. Thutlukna tawp siam tur chu Yoro a ni. Los Blancos erawhin Yoro hi la thei turah an inngai a, hlauhthawnna an nei lo.