India head coach thar Gambhir

India chuan Rahul Dravid thlak turin head coach atan opening batter hlui Gautam Gambhir an ruat. Dravid hian India tana head coach hna a thawh hnuhnun berah T20 World Cup a champion pui avangin a hmunruak hi a zau hle.

Kum 42 mi Gambhir hian Indian Premier League hnuhnung berah khan Kolkata Knight Riders enkawlin nomawi a chawipui a, IPL-a a record ṭha hi India tan chhunzawm a tum ang.

Gambhir chuan, "Indian ka ni a, ka ram tana ka theihna zawng zawng hlan hi ka tih tur a ni. India team-a let leh theihna remchang ka nei hi ka inchhuang a, ka hna erawh a inang dawn tawh lo thung. Ka tum erawh a ngai reng a, India mipui lawmna siam ka duh a ni," tiin a sawi.

Kum 2003 khan Gambhir hian India tan a match hmasa ber a khel ṭan a, inelna pathum T20, ODI leh Tests-ah ram tan 10,000 runs chuang siamin kum 2016 inkhelh a chawlhsan.

Inkhelh a chawlh hnuin commentary hna a thawk a, politics-ah lut lehin hemi zawh hian Kolkata-ah coaching hna a thawk. BCCI secretary Jay Shah chuan, "Gambhir hian India kawng dik zawhpui thei turin theihna a nei a, a chanchin hi a thlir kir ila, a hlawhtling em em a ni," tiin India coach thar a fak.

India hian tun thla tawp hian Sri Lanka nen ODI series an khel dawn a, Gambhir-a'n India team a enkawl ṭan ang. Men in Blue hian thla liam ta khan T20 World Cup final-ah South Africa hnehin kum 13 hnuah khawvel pum huap inelnaah an champion.