Lunglei club SYS an chak nghal

LZ Juice MPL11-ah SYS FC chuan anmahni ang bawka vawi khat khelhna Sihphir Venghlun chu nimin khan 2-0 in an hneh a, Lunglei club tan Ricky H. Vanlalhriatsanga leh Mesak Lalrinngheta ten an khung. Player naupang rual awm khawmna SYS tan chanchin lawmawm a tling.

RG Stadium-ah team pahnihin inkhel nung an lantir a, an fitness a ṭhat bawk avangin an tlan tam dun hle. SYS-in bul ṭan ṭha hret mah se Sihphir Venghlun an insiamrem a, inkhel an thunun zawk.

Sihphir Venghlun tan Ricky Lalramnghaka leh Lalremruata ten hun ṭha an bawhpelh a, SYS goalkeeper Joseph Laltluangpuia a khel ṭha ve bawk. SYS-in first half tawp hma hretin Lalruatsanga hmangin chance ṭha bik an nei a, goal zawnah a pet thei lo.

Second half-ah SYS an insiamrem a, inkhelh kalhmang a inthlak. Inbuatsaihna nei ṭha SYS an chungnung a, an goal khung dan tak erawh mimal tih ṭhat a tih theih. Mual dinglam aṭangin Ricky-a'n player panga zet a hmachhawn a, angle zim mah se Sihphir Venghlun defender Lalruatsanga ke pet perin goal a lut.

Chhum zin vangin inkhel an chawl a, rei lote chawlh hnuah inkhel ṭan lehin SYS an vannei - penalty an hlawh chhhuak. Penalty hi minute 74-naah Mesak-a'n a pet goal a, goal dang a luh belh tawh lo.