Suarez + Neymar + Messi = 3 Goals Field chhungah Barcelona an buai lo
Barcelona-ah Lionel Messi a nghet e. Argentine forward hian Pathianni zan khan Nou Camp-ah a thiamzia lantir leh a, Barcelona-in La Liga hmahruaitu Real Madrid hnehtu Atletico Madrid chu 3-1 in an hneh.
Mual neituin inkhel an thunun a, Luis Suarez leh Messi te thawhrah sengin Neymar-a'n minute 12-na lekah goal hmahruai a khung a, minute 35-naah Suarez-a'n goal hnihna a khung veleh a, a siamsaktu hi Messi a ni. Second half ṭan aṭanga minute 12-naah Mario Mandzukic-a'n penalty aṭangin Atletico goal khatna a khung a, penalty chawitu hi Messi bawk a ni. A tawpah Messi hming a langsar leh a, minute 87-naah Barca goal thumna a khung.
Barcelona hian point 41 hmuin Atletico Madrid aiin point thumin an sang a, anni aia game khata khel tlem Real Madrid chu point khatin an pha lo.
Inkhelh hma buaina
Barca boss Luis Enrique dinhmun a derthawng a, report ṭhenkhatah chuan Atletico an hneh loh chuan ban tura sawi hial a ni. An player ṭha ber Messi leh manager hi an inhmuthiam lo a, dam lohna chhuanlamin Messi-a'n training a zawm lo tih thawm a awm bawk. Transfer boruak-ah Messi hi chhuak tur angin an sawi nasa hle.
Messi Show
Season liam taa Barcelona champion-na kawng daltu chu Atletico Madrid hi an ni a, Nou Camp-ah point an hlawh chhuah avangin La Liga-ah an champion a ni.
Pathianni zanah Messi a langsar a, Argentine forward hian goal khung theihna chance a nei hmasa ber a. Jordi Alba tan goal khung theihna turin Messi hian ball ṭha a pe a, Neymar-a'n goal hmahruai a khung theihna turin a ṭangkai takzet a, Suarez-a goal khung tur a siam bawk. Heng thil thleng hi minute 45 chhung chauha thleng a ni.
Brazil forward Neymar a hmuhnawm a, Suarez a thawkrim a, Rakitic-a'n midfield thunun mah se player pawimawh ber chu Messi a la ni tho.
Messi-a'n penalty a la chawi ngai lo a, a vawikhatna atan Atletico lamah a chawi ta. Chutichung chuan mipuiin a vawi khat tihsual hi an hrethiam a, an au rualna hla chu 'Messi, Messi, Messi' tih a ni.
Hun harsa karah Catalan mipui an phur hle a, hun tawp thlengin Messi hi an ṭang hle a ni. Barca star hian mipui lawm nan minute 87-naah chakna nemnghehna goal a khung zui bawk. 3-1 inkhel a tawp a, inkhel thununtu Barcelona-in an phu ang takin point thum an hlawhchhuak.
Rilru a dam ta
Barcelona president Josep Maria Bartomeu chuan, "Club chhunga buaina hi chu kan dah ṭhat a ṭul. Tunah chuan kan hahdam thei tawh e. Messi hian team chhungah phurna min pe a, zanin chauh a pawh a ni lo," tiin a sawi.
Barca manager Luis Enrique chuan, "Chak result neih hi team ti chaktu a ni. Point thum kan hlawhchhuak a, thil dang a thleng lo. Kan chak chuan kan hlim a, kan rilru put hmang a ṭha sawt bawk," tiin a sawi.
Barca tana langsar Lionel Messi chuan, "Luis Enrique nena kan inkarah buaina awm turah an ngai a, a dik lo. Coach bang tur angin ka nawr tih hi thu dik lo a ni a, chutiang bawkin ka chhuak tur anga an sawi hi a dik lo. Barcelona-in hlawhtlinna an chan theihna turin thla ruk kan la nei, kan ṭang zel ang," tiin a sawi.
Chak lo thukhawchang
Atletico Madrid boss Diego Simeone chuan, "Barca-in goal hnihna an khung theih nan khan Messi khan a kutin ball a khawih a ni. Amah chuan ka khawih lo ti mah se ka hmu chiang a ni. A hnuah kha chuan goal mawi tak a ni nachungin handball ham loh aṭanga inṭan a ni," tiin referee thutluknaa a lungawi loh thu a sawi.
Simeone chuan sawi chhunzawmin, "First half-ah kan khel ṭha lo a, second half-ah erawh kan ineltawk viauin ka hria. Kan siphurh sut theihna hun kan nei a, amaherawhchu goal thumna luh takah kha chuan tih theih kan nei lo," tiin a sawi.
Second half-ah hian Gabi aiah Fernando Torres a lut a, Torres luh hnuah Atletico game a ṭha sawt a, a result erawh a danglam phah lo.
MATCH FACTS
Barcelona 3-1 Atletico Madrid
Barca : Neymar 12', Suarez 35', Messi 87'
Atletico : Mandzukic (P) 57'
Tute nge khel?
Barcelona (4-3-3): Bravo; Alves, Pique, Mascherano, Alba; Iniesta, Busquets, Rakitic (Rafinha); Neymar, Messi, Suarez (Pedro).
Subs chhawr loh : Stegen, Bartra, Roberto, Adriano, Munir
Atletico Madrid (4-2-3-1): Moya; Juanfran, Godin, Gimenez, Gamez (Siqueira); Gabi (Torres), Tiago; Koke, Griezmann (Garcia), Arda, Mandzukic.
Subs chhawr loh : Suarez, Oblak, Niguez, Miranda.