Mizo 3 telna Bengaluru FC Federation Cup-ah an champion

An season hmasa bera I League-a an champion hnuah Bengaluru FC chu Federation Cup-ah an champion leh ta. Pathiannia Goa-a final-ah Mizo pathum khelhna Bengaluru hian Dempo SC chu 3-0 in an hneh.

Fatorda Stadium-a khelh Federation Cup vawi 36-na final-ah hian Sunil Chhetri (10') leh Robin Singh (65')-te'n Bengaluru tan goal an thun a, Dempo goal hi Tolgay Ozbey (45+2') thun a ni.

Bengaluru tan hian season hmasaa an star leh final-a champion-na goal siamsaktu Beikhokhei chu a che ṭha chhunzawm zel a; tun season-a an lak thar Shillong Lajong player hlui pahnih Lalchhuanmawia, Lengpui leh keeper Lalthuammawia Ralte, Champhai-te pawh starting XI-ah an tel nghal bawk a, an player pawimawh an ni.

Bengaluru assistant coach leh Lajong boss hlui ni bawk Pradhym Reddy chuan, "Kan chak hi ka lawm khawp mai. Mizo player pathumte an thawh hlawk e. Mizo ṭhatna hi ka hre chiang a, player dang pawh kan lak belh zel ka ring," tiin Vanglaini a hrilh. Pradhym hi Lajong a enkawllai pawha Mizo hlang deuhthawa team lo din tawhtu kha a ni.

Saiha lam chhuak Beikhokhei chuan, "I League leh Federation Cup-a ka champion ve ta mai hi ka lawm khawp mai," a ti a, ani hi Mizoram Under 16 leh Under 19 team vel aṭanga inzir chhuak a ni a; Chhuantea leh Thuama-te pawh hi Mizoram sub junior team aṭanga bul ṭan an ni.