Juventus an chak

Roma-in min hrethiam se, Juve an champion ang - Benitez

Manager-te ṭawngkam hi football tingaihnawmtu a ni fo. Pathianni zan khan Napoli chu an khelmual Stadio San Paolo-ah Juventus lakah an tlawm a, Liverpool manager hlui Rafa Benitez chuan Juventus a fak bakah Roma tana hriat hreawm ṭawngkam a hmang zauh. Serie A-a pahnihna AS Roma hian Lazio an draw vangin hmaruaitu Juve hi point thumin an pha lo.
Italian Super Cup phuba
December 22 khan Doha-ah Napoli leh Juventus hian Italian Super Cup an khel a, hun pangngaia 2-2 a an inhnehtawk hnuah penaltyshootout-ah Napoli an chak.
Napoli-in Sampdoria aṭanga an lak Manolo Gabbiadini chu chhawr theih turin bench-ah an ṭhuttir a; Lorenzo Insigne, Michu, Juan Camilo Zuniga leh Faouzi Ghoulam te erawh chhawr theih an ni lo.
Juventus-in defender Stephan Lichtsteiner a inhliam avangin thla thum hnua a vawikhatna atan Martin Caceres chuan thla thum hnua a vawikhatna atan starting eleven a chang a; Kwadwo Asamoah, Andrea Barzagli leh Romulo te erawh an chhawr thei bik lo.
Juventus hian an match hnuhnung paruk zinga pangaah hnehna chang mah se September 2000 hnuah San Paolo-ah chak hmel an hmu leh tawh lo.
Napoli hi mualneitu ni mah se goal venhim hmasak chu an duh dan a ni a, counter attack hmanga nawr let chu an tum dan a ni. Marek Hamsik thiam zarah an tum a hlawhtling teuh viau a, Slovak midfielder ball fing tak chu yard 12 vel lek aṭangin Jonathan de Guzman-a'n a pet over.
Juventus an awm mai mai bik lo, Carlos Tevez pass chu Arturo Vidal tan goal khung theihna tur a ni nachungin Chilean midfielder first touch ṭhat loh vangin goal hlauhawm a ni lo. Minute 29-naah goal ropui a lut a, Fernando Llorente tihsual per kang chu nalh takin Paul Pogba-a'n a volley goal a, Champions League Final-a Zinedine Zidane-a goal te nen pawh khan inang khat tak a ni. Kum 21-a upa French midfielder hian Napoli lamah goal a khung thei ve reng reng a, vawi nga an inhmachhawn tawhah goal thum a khungna a ni.
First half-a goal khat chauh a luh hnuah second half nung tak an khel a, Callejon ball pet chuan Juve defender Giorgio Chiellini a per hnuah goal sirah chiah a kal a; Juventus wing back Caceres cross yard ruk aṭangin Pogba-a'n a khawih hman lo chiah chiah bawk.
Napoli goal bawh a na a, Juventus tlar hnungin a dawl seng lo. Minute 64-naa Dries Mertens corner chu defender Miguel Angel Britos-a'n Chiellini venna hnuai aṭanga tal putin a volley goal, 1-1 a ni.
Mual neituin hma an hruai rei lo a, an tih goal ang thoin Juventus an thun tir. Minute 69-naah Andrea Pirlo freekick chu defender Caceres-a'n a khung a, 2-1 a ni. Goal luhna kawnga inrawlh Chiellini chu replay aṭangin a offside ngei tih a lang.
Inkhel boruak a nung chho a, Juve keeper Gianluigi Buffon-a'n cross ball man mai a tum chu Kalidou Koulibaly nen an insutna lamah ball a thlauh a, referee-in keeper chhanin foul a ham a, Napoli player-te an lungawi lo hle.
Napoli-in an nawr chhunzawm a, Duvan Zapata-an chance ṭha a neih chu keeper Buffon-a'n a tibuai hman a. Argentine forward Gonzalo Higuain-a'n hun tawp lamah an siphurh a sut teuh viau bawk.
Injury time-ah Vidal-a'n Juventus goal thumna a khung a, Napoli tan beisei tur a awm tawh lo. Serie A hmahruai mektu Juventus-in dinhmun sawhnghet nan Napoli 3-1 in an hneh.
Eng nge an sawi?
Juventus boss Max Allegri chuan, "Coach, player leh club president-te'n tihsual an nei fo a, referee-in eng vangin nge a tihsual loh bik ang. Thutlukna dik tawk loa buaina kan siam zel chuan game-in a tuar a, buaina siam tum reng player hmuh an hreawm bawk. A vanduaithlak lai chu Italy a ni a, tumahin chak loh kan duh lo," tiin a sawi.
Allegri chuan sawi chhunzawmin, "Hmasawnna tur kan nei a, chutiang zingah chuan kan game chak dan te leh kan ball pass chak zawngte hi a pawimawh lai chu a ni. Juventus hian a zawnin vawi thum an champion tawh a, vawi lina kan lak theih chuan a nepna tur a awm chuang lo. Theihtawp kan chhuah zel ang," tiin a sawi.
Roma manager Rafa Benitez chuan, "Roma-in min hrethiam se, Juve an champion ang - team ṭha an ni. Chutihrualin an goal hnih luhna tura lu tuam luk Chiellini offside hmuh kha chu thil awlsam tak tur a ni. Offside goal kha inkhel tidanglamtu a ni," tiin referee thutluknaa a lungawi loh thu a sawi.
Benitez chuan sawi chhunzawmin, "Juventus khel vawi tam tak en hnua ka sawi theih chu an champion ang tih hi a ni. Team ṭha tak an ni a, an thawkrim a, referee-in thutlukna dik lo an neih
ṭhin avangin elpui hi an harsa a ni," a ti.
Goal, Selfie, Totti
Derby della Capitale hi Rome khaw club pahnih Lazio leh AS Roma te inkhel sawina a ni. Pathianni zan khan derby hmuhnawm takah Lazio-in Stefano Mauri leh Felipe Anderson te goal hmangin Lazio-in goal hnihin hma hruai mah se Roma-in captain Francesco Totti goal hnih hmangin an sut.
Kum 38-a upa Totti hi a la chuai thei tak tak lo, an siphurh sut nan Totti hian Jose Holebas cross chu chep tak
aṭangin a volley goal a, a goal lawm dan a la dangdai cheu. Field sir lamah tlan pheiin a ṭhianpain mobile phone a lo pe a, mipui au rual dual dual hmaah amah leh amah (selfie) thla a inlak.
Hun tawp dawn lamah substitute Miroslav Klose hmangin Lazio an chak teuh viau a, Roma an ṭang tluan a, 2-2 in inkhel a tawp.
Inter thar
San Siro-ah Inter Milan hmel thar an inlan a, Lukas Podolski-a'n a vawikhatna atan starting eleven a chang a; player thar dang Xherdan Shaqiri chuan bench a luah lum thung.
Rodrigo Palacio-a'n a club hlui Genoa lamah minute 12-na lekah Inter goal hmahruai a khung a, Mauro Icardi-a'n first half tawp hma minute rukah goal hnihna a khung leh bawk.
Hun tawp hma minute nga chiah a awm tawh tihin Armando Izzo-a'n Genoa tan khung ve mah se minute hnih hnua Manchester United captain hlui Nemanja Vidic-a'n corner aṭanga Inter goal thumna a tauh luh avangin Genoa tan beisei tur a awm lo.
October thla hnuaa a vawikhatna atan Inter Milan-in an khelmualah hnehna an chang.