Goal zawna pet thei lo Man United an chak lo

1988 hnuah Sou­thampton chu Old Trafford-ah an chak ve ta. Pathianni khan Dusan Tadic-a goal hmangin Manchester United 1-0 in an hneh a, point 39 hmuin pathumnaah an kaisang a, United hi palina an ni.

David Moyes-a hnuaia game 21 hnua an point hmuh zat chu 37 a ni. Luois van gaal hnuaia khelh 21 hnua an point hmuh zat chu 37 tho a ni - LVG hian player leina turin sum tam tak a seng - hei hi Manchester United dinhmun a ni.

Pathianni inkhelah hian United-in goal an thun lo a ni mai lo a, goal zawnah vawi khat pawh an pet thei lo. LVG chuan a player-te a rem kual tawn sek a, awmzia a nei lo a, si an phurh hnua goal thun tuma an tawngpawng nawr chiam chu an khelh ṭhatlai ber a ni a, heti chung hian goal zawnah an pet lo.

Inkhel chanchin

United boss-in tun hnaia tlar hmaa an dah ṭhin Radamel Falcao an luhtir lo a, chu mai ni loin bench pawh a chang lo. Wayne Rooney, Robin van Persie leh Angel di Maria-te an awm avangin a mamawh loah a inngai a ni.

Inkhel an ṭan a, team pahnih an inveng tawn. A tu mah mahin goal hlauhawm an nei meuh lo a, Angel Di Maria chuan ṭum hnih vel goal hlauhawm vak loin a pet. Southampton hian an defender ṭha Toby Alderweireld a inhliam hnuah pawh an goal an venghim ṭha a, an goal nawr phei chhunah United tlar hnung an bawh buai ṭhin hle.

Second half a ni a, goal hlauhawm a la awm thei chuang lo a, pathumna leh palina inkhel ni si ball inpek sual a tam a, Dutch coach pahnihin goal thun tuma nawr vak an ngam lo a, an inveng tawn nasa mai.

Minute 69-na a ni a, Graziano Pelle chuan chak taka ball lalutin goal ban a tihper a, a per lêt leh chu Tadic chuan 'cool' takin a thun a, 1-0 a ni.

LVG chuan ṭangkai lo tak Luke Shaw aiah Daley Blind chu left back-ah dahin ani hian ṭum hnih chu ball hlauhawm tak a vawrh lut a; nimahsela Southampton tlarhnungin United tlar hmaa hlawh tam rualte an veng hneh takzet.

Inkhel leh a chhehvel

Southampton boss Ronald Koeman hi khawvela defender ṭha ber zinga mi a ni ṭhin a, a naute'n an goal venhim an thiam hi a mak lo.

Football khawvela tactician ropuia chhiar tel ni ve ṭhin si, LVG-a'n player man to rual ho khawm chunga goal-a vawi khat pawh an pet lo hi a mak. United hi an khel chhe zawn rei tawh a, tun hnaia an chak theih loh hma deuha an chak dan pawh kha 'vanneih chak' a tam hle. Khel ṭha tluang Falcao bench pawh chang phak loa a awm chu boss zawk a insawifiah ta hial!

Wing-back pahnih Shaw leh Antonio Valencia-te'n ball an hmu tam a, ball hlauhawm tak an cross mang lo. A laiah 'target man' an nei bawk si lo a, Juan Mata leh Rooney-te Southampton lamin an veng hneh bawk si a, minute 90 chhungin United-in awmze neia goal nawr an nei mang lo.

LVG hian tun thlengin a player-te position nghet a la neihtir lo. Left back-a ṭangkai em em Blind chu central midfielder-ah a chhawr a, Michael Carrick chu a laia defender pathum a dah zingah a telh ve bawk - Pathianni zanah a tifuh lo hle tih a lang.

Koeman a fakawm. A player-te a hriat chian tluk zetin an khingpui a zir chiang a, awmze neiin an inrem a, an chak. Old Trafford-a goal chhuah loh hi thil harsa tak a ni a, tun season-a he khelmuala chak thei pahnihna chauh an ni.

Koeman a ṭawng e

Tun hmaa Holland lama a pu hlui LVG nen lo inhmu thiam lo tawh ṭhin Koeman chuan, "Season ṭan dawn khan Europe-a khelh phak hi kan tum ni mah se sawi a la hun lo a, tunah chuan kan tum kan chiang tawh a, Europe-a khelh ngei hi kan duh a ni," a ti a, season tawpah parukna tal nih phak ngei an tum.

Kum 27 hnua Old Trafford-a Southampton chakpui leh hmasa bertu chuan, "Central defender pathum an hmang hi an buai tih kan hria a, keini lam hi chu season tluanin kan inrem fuh hle a ni... game 21-a goal chhuah loh vawi 11 kan nei hi kan hlawhtlin chhan a ni," a ti.

Koeman chuan Werder Bremen aṭanga loa-a an hawh thar Eljero Elia khelh dan chu lawmawm a tih thu a sawi a, "A game hmasa ber a ni a, a khel ṭha khawp mai... hma a sawn zel ang tih ka ring," a ti a, Netherlands international winger hi a khel ṭha hle.

Koeman hian season hmasaa che ṭha tak Sou­thampton kha a rochun lo a, player ṭha zawng zawngin an chhuahsan team a enkawl a, tunah season chanveah pathumna a nihpui thei.

LVG a insawifiah

Khawvela striker hlauhawm ber pawl a kawl a, bench pawh a chang phak lo. Falcao an khelhtir loh ṭumin goal thun chu sawi loh goal zawnah pawh an pet lo a, United boss a insawifiah.

Barcelona, Ajax leh Bayern Munich te pawh lo enkawl tawh ṭhin chuan, "Coach chuan kan team kan en a ngai a, game plan kan neih mila kan inrem a ngaih chang a awm a, kan team mamawh tur player kan thlan a ngai. Hei vang hian player 18 zingah a (Falcao) tel ve ta lo a, a chhan chu kan insawi danglam vang a ni a, Luke Shaw leh Di Maria-te ka luhtir an ngai si a ni," a ti.

Media report dan chuan kar khata pound 2,65,000 zet hlawh Falcao hi United-in season tawpah an duh chuan an la nghet thei a; nimahsela an beisei anga a khelh loh avangin a tlatlum lo sawt em em a, season tawpa chhuah leh mai an duh hial tawh a ni awm e.

United boss chuan, "Southampton kha an vannei a ni. Draw tumin an khel a, an vanneia an chak a, an goal kha vanneih goal a ni. Kan chak loh avangin insiam ṭhat a ngai a ni," tiin a sawi.