Ligue 1 hmahruaitu thar Lyon
Lyon-in Inrinni zana Marseille leh PSG chak loh an hmang ṭangkai a, Pathanni zan khan Toulouse hnehin Ligue 1 hmahruaitu an ni.
Stade Gerland-ah Liverpool nena an sawi zawm Alexandre Lacazette goal hnih leh Nabil Fekir te goal hmangin Lyon-in an mikhual Toulouse 3-0 in an hneh. Goal zawng zawng hi minute 50 hma lama lut a ni.
Minute 14-naah Lacazette hmangin Lyon-in hma an hruai a, Fekir through ball ṭha tak chu Lacazette hian goal-ah pet nghalin keeper Ali Ahamada-a'n a dang lo. Minute 27 hnuah goal hnihna a lut a, Lacazette a zawnah tak ball a tla a, French forward hian awlsam takin a goal hnihna a khung.
Second half ṭan aṭanga minute thumnaah Rachid Ghezzal ball pass chu Fekir tan duhthusam a ni a, French-Algerian attaking midfielder hian keeper chauh a hmachhawn a, a ball pet hmasak keeper Ali Ahamada-a'n khawih mah se a goal tho.
3-0 inkhel a tawp a, Lyon-in point 42 hmuin hmahruaitu an ni a, anmahni hnaih bertu Marseille aiin point khatin an sang.
Lyon hi kum 2000 leh 2008 chhunga French club roreltu an ni a, hemi chhung hian Ligue 1-ah a zawnin vawi sarih an champion. An champion hnuhnun ber ṭum chu 2007-08 season kha a ni a, khami hnu khan an champion leh tawh lo.
Lyon hian player manto bik an nei lo a, a hnuaia awm PSG erawhin player panga lai euro maktaduai 40 chuang man an nei a, chuvangin Lyon tan hmahruaitu nih hi a awlsam lo.
Lyon coach Hubert Fournier chuan, "Kan thleng sang viauin ka hria. Hun harsaah team angin kan khel thei a, season tawp hma chu kan dinhmun a la chiang lo. Chutihrualin tun aia ṭha chuan kan khel thei tih ka hria," tiin a sawi.