2015 Australian Open leh a chhehvel
Tennis hun pui a thleng hnai leh ta a, January 19 aṭanga khelh ṭan tur Australian Open hi hun pui chu a ni. Grand Slam hmasa ber hi tennis ngainatuten an ngaihven tawh hle.
2015 Australian Open danglamna tur chu 'retractable roof' a ni. Melbourne-ah inkhelh laia 40 Celcius laia sang te a nih ṭhin avangin player-te'n harsatna an tawk ṭhin a, khawlum kara inkhel hmuhnawm tak an khelh theih nan 'retractable roof' hi pawimawh ang.
Champ lai a inpeih
Tennis 'big four - Novak Djokovic, Rafael Nadal, Roger Federer & Andy Murray' te kawng zawh lai tikhaihlak thei Swiss player Stanisla Wawrinka hi Australian Open champion lai chu a ni.
Nikum October thleng khan Wawrinka hi Swiss number 2 leh World number 4 a ni pha. 2013 US Open-ah semi final a thleng a, Novak Djokovic lakah a tlawm. Wawrinka hi 2008 Summer Olympics khan Roger Federer nen Switzerland tan men's double-ah medal an dawng a, Monte Carlo Masters 2014-ah a champion leh bawk. Nikuma Australian Open champion tur hian final-ah Rafael Nadal a hneh a, final kakawngah Djokovic a hneh bawk.
2015 Australian Open-ah hian a zawna champion turin Swiss tennis player hian beiseina sang tak a nei a, hemi atana inpuahchahna tournament Chennai Open-ah a champion.
Li Na a chawl tawh
Chinese Tennis player Li Na hian nikum khan Wold number 2 hial a thleng pha a, Australian Open hmeichhe champion lai a ni. September 11, 2014 khan tennis khelh a chawlhsan avangin tun ṭumah hian kan hmu dawn lo.
Inlan lo tur player langsar
US Open champion Croatian star Marin Cilic chuan a dar hliam avangin Australian Open aṭangin a inhnukdawk.
Kum 26-a upa World number 9 Cilic chuan sawiin, "Ka dar dinglam ka tihnat avangin hun engemaw chen ka game khel thei loin ka awm tawh a ni. Doctor-ten ka natna a belhchhah loh nan fimkhur hle turin min ti a ni. Ka natna hi a ni telin dam chho hret hret mah se inelna sang ber hmachhawn turin ka fit tawk lo a ni," a ti.
Cilic hi 2010 Australian Open khan semi-finalist a ni a, Wimbledon quarter-finalist a lo ni tawh bawk.
French player kum 29-na hmang mek Jo-Wilfried Tsonga pawh a banah hliam neiin Australian Open a khel lo tura ngaih a ni.
Tsonga chuan, "Ka hliam ngai awh phak hun leh training hmabak te ka ngaihtuahin, ka khelh theihna chance a tlem hle," tiin a sawi.
Tsonga hi French number 1 niin World-ah chuan number 12 a ni. 2008 Australian Open-ah khan Tsonga hian final inhlap thlengin, Novak Djokovic a hneh zo lo a nih kha. Tsonga hi Wimbledon semi-finalist ṭum hnih a lo ni tawh a ni.
Australian Open chu
Kum 1905 a ṭan tawh Tennis Australia te buatsaih Australia Open hi inkhel entu mipui ngah lamah US Open dawt chiah a ni. Grand Slam event pali zingah khawlum leh ruahsur laia inkhel tikhaihlak lo tur 'retractable roof' Stadium hmang hmasa ber an ni bawk.
October 4, 2011 khan tournament director chuan 2012 Australia Open atan prize money chu Australian dollar maktaduai 26-a pun a ni tih a sawi a, a hunlaia prize money san berna a ni. Kumin hian 10% in prize money hi tihpun a ni a, pawisa semchhuah tur belhkhawm hi Australian dollar maktaduai 36.3 a ni.
Kum 100 chuang zet khelh tawh Australian Open a hnai ta, category hrang hrang-ah player ṭha an inlan dawn e - a hmuhnawm ang.