Arsenal leh Alexis Sanchez an kal zel

Alexis Sanchez-a'n tun season-a goal 18 a thunna inkhelah Mesut Ozil a lo kir leh ta chiah a, Arsenal tan kum 2015 hi kum ṭha a ni dawn em?

Pathianni Premier League-ah Stoke City 3-0 in an hneh a, Laurent Koscielny chuan minute ruknaah goal hmahruai a thun a, minute 33 leh 49-ah Sanchez chuan goal a thun belh. Arsenal-in Champions League khelh an tum tih an tichiang leh ta.

Inkhel chanchin

Inkhel an ṭan chiah a, a goal hma hle. Minute ruknaah a goal a, he mi hma pawh hian Sanchez leh Tomas Rosicky-te chuan mikhual goalkeeper Asmir Begovic chu hna an siamsak tawh a; minute ruknaa Sanchez-a ball pek chu Laurent Koscielny chuan a thun a, Stoke lam an inveng ṭha lo a ni.

Arsenal defender Matthieu Debuchy a inhliam hnuah pawh a khel ṭha zawkah an la ṭang zel a, minute 33-naah Rosicky ball pek chu Sanchez chuan mawi takin a thun a, goal ropui a ni a, half time-ah 2-0 a ni.

Second half-a goal lut awm chhun hi freekick aṭanga Sanchez-a pet luh a ni a, Barcelona bench-a ṭhu ṭhin hian Arsenal tan goal 18 a thun der tawh.

Goal thum an chhuah hnua Stoke tana Geoff Cameron goal thun chu offside vangin an pawmpui lo a, Arsenal keeper David Ospina chuan Stephen Ireland-a goal thun tur ṭha tak a dang bawk.

Minute 73-naah Ozil a lo lut a, hei hi Arsenal lawmna tizualtu a ni. An player man to ber inhliam a dam ta a; Champions League khel phak dinhmuna ding Man United aiin point khat chiahin an tlem ta.

Inkhel chhehvel

'Arsenal dang turin Thierry Henry dan a tawk' an tih ṭhinlai a awm a, tunah chuan Sanchez dan a tawk! Chelsea-in Arsenal an hneh ṭum khan Sanchez vengtu hi mi pahnih an awm a, Jose Mourinho-a'n an khingpui player hlauhawm ber a hre fuh - Sanchez-a hlauhawmzia hre 'duh lo' chuan an tuar zel a, Stoke boss Mark Hughes hian a hre chiang tawh ang!

Rosicky hian tun season-ah ṭha tak taka khelh a nei fo a, a inhliam lo a nih chuan he midfielder tawnhriat ngah hi season chawhnu lam game boruak sangah a

ṭangkai thei ang. Ozil-a lo kir leh hmuh a nuam a, a la tlan chak loin a tlan tam lo a, he inkhel hi October hnua khelmuala a inlanna hmasa ber a nih vangin amah leh Arsenal fans an lawm ang.

Arsenal tana lawmawm chu goal an chhuah lo hi a ni. He team hian tun season-ah goal 25 an chhuah tawh a, Manchester United defender 'phuahchawp' ai pawhin an chhuah hnem a, tun hnaia an goal a phui ṭan ta hi lawmna tham a tling.

Sanchez a ropui

He Chile player hian tun season-ah Arsenal tan goal 18 a thun tawh a, heng zinga 12 hi Premier League-a a thun a ni. Premier League-ah bik goal 19-ah a inrawlh a, goal-a inrawlh hnem ber a ni.

Goal hmahruai a siamsak dan leh an goal hnihna a thun dan kha uluk takin ennawn leh ila, a tih hram hram rah a ni. A tisual zet a, ball chang turin a bei leh chiam a, a tawpah goal a hlawh chhuak.

Sanchez hi Lionel Messi leh Xavi-te kiangah chuan technique nei ṭha ber a nih loh avangin a hlawhtling tawk lo a ni mai thei a; nimahsela tharum leh speed pawimawhna ram England-ah chuan player hlauhawm a ni. A ball thiam dan pawh Cristiano Ronaldo-te ang ni ve lem lo mah se a ṭangkai tawkin a thiam a, a finishing a ṭhat bawk avangin he inkhel entu zinga mi Thierry Henry leh Robert Pires-te anga Arsenal fans-in an lawm zui tur zingah a la tel thei hial ang.

Goal hnih a thun a, goal khat dang a siamsak bakah a ṭhiante tan goal thunna remchang (chance) vawi nga a siamsak a, Arsenal season chhe tur siam ṭhatu chu Sanchez hi a ni.

Eng nge an sawi?

Arsenal manager Arsene Wenger chuan, "Sanchez hi player ṭha ber zinga mi a ni. Talent a neih bakah a fighting spirit a ṭha a, nuam ti takin a inkhel thei a, khelmuala a khelh dan en hian chu chu kan hmu thei a ni," a ti.

Wenger chuan a naute chu hma an sawn zel a beisei thu a sawi a, an chet ṭhat kaltluan dawna an tawlhthlu leh zauh ṭhin chu an insiam ṭhat a rin thu a sawi bakah, Arsenal game-ah hmasawnna hmuh tur a awm thu a sawi.

Stoke manager Mark Hughes chuan, "Team ṭha zawk kan hneh lo a, chak loh chhuanlam sawi tur kan nei lo. Tun aia ṭhaa khel thei tur hi chu kan ni," a ti.