Man City champion beiseina a tawp?

Premier League champion lai Manchester City-in Aston Villa 6-1 a an hneh zawhah Crystal Palace nen Inrinni zan khan 2-2 in an inhnehtawk.

Pep Guardiola chuan, "Season thara Champions League khel thei turin dinhmun sawhngheh kan tum," tiin a sawi a, match hniha khel tam chunga Liverpool point 13 zeta an phak loh avangin nomawi a beisei tawh lo.

Inrinni zan Premier League inkhelah club lian tiha chhalten hnehna an chang lo a, Jose Mourinho enkawl Tottenham pawh Watford nen goal awm loin an inhnehtawk.

Manchester City-in ṭan phat aṭangin an thiamzia an lantir nghal a, goal an khung theih miau loh avangin Crystal Palace tan beiseina tur a awm ve reng thung. Minute 39-naah Cenk Tosun hmangin Palace-in hma an hruai a, goal luh theih nan Gary Cahill chu Man City defender John Stones aiin an zuang sang zawk.

Second half-ah Man City-in an nawr na sawt a, minute 82-naah Gabriel Jesus-a cross chu Sergio Aguero-a'n a tlawh lut. Argentine forward hian minute nga hnuah Benjamin Mendy-a cross a tauh lut leh a, Etihad Stadium-ah mipui thawm a ṭha hle. City-in chak turah inngai tawh mah se Palace winger Wilfried Zaha-a'n tum dang a nei a, hmun chep tak kar aṭanga a cross ṭha zet chu Fernandinho-a'n an lamah tlawh lut. Pep Guardiola hoten ṭum dang ang thoin tlarhnung vangin point an hloh a, Zaha chelh thei lotu Stones a che ṭha tawk lo.

Pep Guardiola-a'n defender inhliam a nei ṭhin bawk nen tun season-ah tlarhnung a rem fuh lo a, goal 64 zet khung mah se goal 27 an chhuah. An elpui ber Liverpool erawhin goal 14 chauh an chhuah a, Pep-a leh Jurgen Klopp-a enkawl team danglam chu tlarhnung tiin a sawi theih.

Manchester City manager Pep Guardiola kum 49 pianchamphaah a nauten result ṭha an neihsak thei lo a, Spanish manager chuan, "Corner vawi khat chiah an nei a, goal chance pawh a insiam thei lo. Keini erawhin vawi tam tak chance kan nei a, heti chunga kan chak zo lo hi hriatthiam a har hle," tiin chak an phu thu a sawi.

Zaha chungchang sawiin Pep Guardiola chuan, "Counter attack a awm a nih chuan Zaha dah ṭha turin ka hrilh," tiin Crystal Palace innghahna an ngaihthah loh thu a sawi a, hetichung hian Stones-a'n a veng hneh lo. Man City hian season thara team an din hunah Stones-a tan hmun a awm zel a rinawm ta lo hle.

Vicarage Road-ah Tottenham Hotspur-in goal an khung thei lo a, Watford forward Troy Deeney-a'n penalty a hlah bawk avangin goal awm loin an inhnehtawk.

Spurs boss Jose Mourinho chuan, "Chak kan phu ka ti. Result hi pawm thiam a harsa, chak lo phei ilang chuan pawm thiam a harsa lehzual ang," tiin an result-ah a lungawi lo tih a sawi.

Mikhual team hian goal khung theihna hun ṭha an nei a, goal hmaah an vannei lo. Injury time-ah Erik Lamela goal khung tur chu Watford substitute Ignacio Pussetto-a'n a pet chhuak hman a, goalline a pelh lohna hi 10.04mm chauh a ni!