Copa America Centenario Messi leh Argentina dang thei an awm lo

Lionel Messi chu Argentina tana goal khung hnem ber a ni ta. Messi hian Venezuela lakah goal khat khungin an ram chu 4-1 in hnehna a chanpui a, Copa America Centenario semifinal a hruai thleng.

Pathianni zing khan Ar-gentina leh Chile ten hnehna changin Copa America semi-final an lut a, inelna thlengtu United States chu a sang palia inhlang kai hmasa ber niin Inrinni zing khan Colombia chuan semifinal an inpet tling bawk.

Nilaini zing dar 6:30 hian Argentina leh United States ten semifinal hmasa zawk an khel ang a, Chile leh Colombia ten Ningani zing dar 5:30 hian final lut tur an zawng bawk ang.

Dan theih loh Argentina

Gillette Stadium-a inkhel-ah captain Messi-a'n tun tour-nament-a a vawi khat nan in-khel bul a ṭan a, goal khat a khung bakah a ṭhiante goal khung tur ṭum hnih a siam sak.

League round lama goal la khung miah lo striker Gonzalo Higuain pawh coach Gerardo Martino-a'n bul ṭan turin a la ring zel bawk. Season liam taa Serie A top scorer Higuain hian coach a ti beidawng lo chiang hle a, Messi siamsak hmangin inkhel ṭan aṭanga minute riatna lekah goal hmahruai khungin minute 28-naah an goal hnihna a khung bawk.

Second half-ah pawh Argen-tina bawk an chungnung leh a, Barcelona star hian minute 60-naah goal khungin Venezuela tan Salomon Rondon-a'n goal khat khung ve bawk mah se Tottenham Hotspur attacking midfielder Erik Lamela chuan Argentina goal lina a khung a, Messi siamsak tho a ni.

Hun a tawp meuh chuan Ar-gentina 4-1 in an chak a, field chhunga langsar ber chu Lionel Messi a ni.

Argentina coach Gerardo Martino chuan, "Messi-a'n goal khung hnem ber record a nih rual ta a, kumin Copa America chhung ngei hian a khung belh ngei ka beiseiin ka duhsak bawk. Tunah chuan US nena kan inkhelh tur kan ngaihtuah a hun tawh a, Venezuela laka kan khelh ang tho khan hmunawl siamsak loh leh kan tum ang," tiin a sawi.

Goal 54-na...?

Kum 28-a upa Messi hian Argentina tan match 111 a khelh aṭangin goal 54 a khung tling ta chiah a, ram tana match 77 a khelh aṭanga goal 54 khungtu Gabriel Batistuta record a nih rual chiahin an ram tana goal khung hnem ber an ni mek.

Serie A club Fiorentina leh AS Roma striker ropui ni ṭhin Batistuta hi ram tana match 78 a khelh aṭanga goal 56 khung anga record a ni ṭhin. Mahse, Argentine Football Association (AFA) chuan a goal hnih khung leh a match khat khelh hi an pawmsak lo.

June 22, 1995 khan Argen-tina leh Slovakia te chuan Estadio Malvinas Argentinas, Mendoza-ah friendly match an khel a, hemi ṭhum hian Batistuta hian goal hnih khungin an ram chu 6-0 in hnehna a chan pui. Mahse hemi ṭum inkhela Slovakia hi B team an nih avangin AFA chuan senior team inelnaah he inkhel hi a chhiar tel lo a ni.

Kum 23 hnua Argentina-in major tournament nomawi chawi leh an beiseina kawnga player pawimawh Messi chuan, "Semifinal kan thleng thei hi kei leh ka player puite tan a hlu a, goal khung hnem record lam ai chuan kan team result hi a pawimawh ber chu a ni," tiin a sawi.

Chile-in goal sur tir

Champion lai Chile-in bei-sei angin tournament bul ṭan
ṭha lo mahse quarterfinal a thlen meuh chuan an zia tak tak an chhuah leh tawh. Eduardo Vargas goal li khung hmangin khel ṭha tluang Mexico chu 7-0 in an sawp.

Levi's Stadium, Santa Clara-a inkhelah Bundesliga club Hoffenheim forward Vargas hian (44', 52', 57', 74')-ah te goal khungin Copa America Centenario khelh mekah top scorer (6) a ni mek. Edson Puch-a'n goal hnih a khung ve leh bakah Arsenal forward Alexis Sanchez chuan goal khat a thawh ve bawk. Mexico hi 1978 World Cup khan West Germany lakah 6-0 in an lo tlawm tawh a, hemi hnuah major tournament-a an chak lo chian ber ṭum a ni.

Chile hian quarterfinal paltlangin lawm hle mah se group stage-a Bolivia 2-1 a an hneh ṭuma goal hnih kungtu Arturo Vidal chu semifinal-ah Colombia a hmachhawn ve thei dawn lo. Bayern Munich midfielder hian league round-ah yellow card a lo hmu tawh a, Mexico lakah hian Puch leh Sanchez te goal khung tur siamsakin khel ṭha hle mah se yellow card a hmuh leh tak avangin match khat khel thei lo tura hrem a ni dawn.

Colombia chakna Ospina

Inrinni zing khan MetLife Stadium, East Rutherford-ah Peru leh Colombia inkhel en turin mipui 79,194 an pungkhawm a, group stage-a Mexico leh Jamaica inhmachhawn ṭuma inkhel entu 83,263 tih lohah chuan mipui tam ber ṭum niin penalty shootout-ah Colombia-in 4-2 in hnehna an chang.

Peru leh Colombia inkhelh ṭum hian minute 90 chhungin fan-ten an hmuh châk ber goal an hmu lo a, Copa America Centenario quarterfinal leh semifinal-ah extra time khelh a nih loh avangin penalty shootout hmanga chak zawk zawn nghal a ni.

Colombia tan Arsenal goalkeeper David Ospina chuan Miguel Trauco penalty pet a dan sak bakah Peru midfielder Christian Cueva chuan a pet over bawk.