Federer-a'n chawlh a duh

Grand Slam vawi 17 champion tawh Roger Federer chuan duh-thu-sama tennis a khelh leh theih nan chawlh hahdam lawk a mamawh thu a sawi chhuak.

Inrinni khan Federer hian Halle, Germany-ah Wimbledon inbuatsaihna tournament Gerry Weber Open semifinal a khel a, German teenager Alexander Zverev lakah 7-6, 5-7, 6-3 in a chak lo.

Tun hmain Gerry Weber Open-ah hian Fe-derer hian sulhnu a nei
ṭha hle a, a inlan hnuhnung vawi 10-ah final a lut vek a, set 15 zet hloh loin a kaltluang bawk. Mahse, kum 19-a upa Zverev laka a chak lo ta a ni.

Kum 34-a upa Federer hi player naupang deuh lakah a chak lo khat hle a, kum 2006 khan khatih laia kum 19-a upa Andy Murray a hneh loh hnua teenager a hneh loh lehna hmasa ber a ni hial.

Hnungzâng na vanga French Open pawh khel thei tawh lo Federer hian a hliam a dam hnuah ngai a la awh leh lo a, kar hmasa khan Mercedes Cup semifinal-ah Dominic Thiem a hneh lo tawh bawk.

Federer chuan chawlh a duh thu sawiin, "Wim-bledon inbuatsaihna hun a tam tawh lo a, major tournament-ah hian round hmasa lamah beisei loh tak tak result a thlen fo avangin chumi pumpelh tura ka lo inbuatsaih a ngai a, ka taksain chawlh a mamawh," tiin a sawi.