Barca-in Angelino lam an hawi

Manchester City defender Angelino chu Barcelona-in lakluh tumin an dawr a, kum 23 mi fullback hi season hman zawh takah khan RB Leipzig tan thla ruk chhung loan-in a khel. 

Spanish defender hian kum 2012 khan City youth team a zawm a, New York City FC, Girona, Mallorca leh NAC Breda-ah te loan-in hun a hmang a, kum 2018 khan PSV Eindhoven chu kum nga chhung a tan a zawm. 

Mahse, City hian an defender lei let theihna dan an neih avangin season khat hnuah pound maktaduai 5.3-in an lei let leh a, City tan match 12-a khelh hnuah January khan RB Leipzig hi loan-a khel turin a zawm a ni. 

Bundesliga club hian Angelino hi an duh chuan pound maktaduai 27-in a nghetin an lalut thei a, Barcelona hian an lei duh a nih chuan pound maktaduai 27 aia tlawma an lei a rem bik lo ang.