Italy nge nge, Belgium an tho

Euro 2012 finalist Italy-in Belgium an hneh hnuah Zirtawpni zan khan Eder-a goal awmchhun hmangin Sweden an hneh leh a, Group D hmahruaitu nichungin last 16 an lut.

Inrinni zanah Belgium an tho chhuak a, Romelu Lukaku goal hnih leh Axel Witsel hmangin Republic of Ireland 3-0 in an sawp. Red Devils hian Nilaini zanah Sweden nen group match hnuhnung ber an khel ang a, Italy leh Republic of Ireland an inhmachhawn bawk ang.

Eder-a Goal

Brazil-a piang Eder hi Euro 2016 ṭan hmain Italy tan goal hnih chauh a la khung a, January thlaa Sampdoria aṭanga Inter Milan-a loan-a kal striker hi player langsar a ni lo.

Sweden-in goal chhuah an duh lo a, Italy lah an danglam bik lo. Inkhel hmuhnawm lo takah goal a lut dawn lo emaw tih hnuah Eder hian minute 88-naah ṭha takin a la lut a, Swedish keeper Andreas Isaksson dan rual loin goal vei lam kilah a pet lut. Eder-a goal hi Italy chak nan a tawk a, Antonio Conte hoten point thum hlu tak an hlawh chhuak.

Italy chak zan hian Manchester United nena sawi zawm Zlatan Ibrahimovic chu Italian defender Giorgio Chiellini-a'n a ven ṭhat avangin player naran mai a ni.

Hei le Lukaku

Belgium coach Marc Wilmots-a'n Italy an hneh loh ṭuma sawisel hlawh Romelu Lukaku chungah rinna a nghat a, Everton striker hian second half-ah goal hnih (48', 70') khungin Zenit Saint Petersburg midfielder Axel Witsel chuan goal khat a khung ve bawk.

Red Devils hian first half-ah inkhel an thunun a, Kevin de Bruyne chu Belgian game siamtu ber a ni. Hun chanve hmalamah goal lut lo mah se second half ṭantirhah Lukaku-a'n a khung a, Republic of Ireland an tho chhuak tawh lo.

Lukaku goal hi kum 16 liam taa Belgian striker Emile Mpenza'n Euro-pean Championship-a goal a khung hnua Belgium-in Euro-a goal an khung lehna hmasa ber a ni.

Belgium coach Marc Wilmots chuan, "Chak emaw chak lo emaw pawh nise inlungrualna hi a pawimawh ber a ni. Romelu Lukaku kha inrintawkna pek kan duh a, Italy nena chet ṭhat loh vang khan ka rin loh phah lo," tiin a sawi.

Republic of Ireland hian goal zawnah vawi khat mah an pet lo a, chak an phu lo hrim hrim. Republic of Ireland boss Martin O'Neill chuan, "Kan enlet a pawimawh a, kan tihsual lai kan hriat a ṭul a ni. Belgium-in goal hmasa ber an khung kha a pawi a, team ṭha tak anni bawk nen kan tan thawh leh ngaihna a awm tawh lo a ni," tiin second half ṭantirha goal an chhuah nghal chu pawi a tih thu a sawi.