Euro 2016 Ronaldo a la 'bo' zel; Portugal an chak thei lo!

Inrinni zan a ni a, khawvela footballer piang tawh zinga thiam ber ang hiala mi tam takin an ngaih Cristiano Ronaldo captain-na hnuaiah Portugal-in Austria an hmachhawn dawn a, Portuguese mipuite beiseina chu 'Ronaldo' a ni.

Khelmualah Ronaldo leh a
ṭhian-te an lut a, Real Madrid forward tan Portugal tana a match 128-na a ni a, ram tana inlan ngun ber Luis Figo record a khum. Mahse, kum 2003-a Kazakhstan nen an inhmachhawn ṭuma rama tana a match hmasa ber kheltu hian record duhawm a siam zanah lawmna tur a hmu lo - penalty a pet goal lo a, goal-a shot a neih vawi 10 zingah goal-a lut a awm lo a, Austria nen goal khung loin an inhnehtawk.

A pawi

Portugal-in an match hmasa berah Iceland chu 1-1 in an inhnehtawkpui tawh a, Ronaldo-a'n na taka Iceland khelh dan a sawisel avangin Portugal captain hian dem rawn a hlawh. Mahse, khelmual pawna a ṭawngkam len ang aiin ram tan Real Madrid forward a lian zo lo!

First half aṭangin goal khung tumin tlan tam viau mah se a beisei ang thlawpna a ṭhiante aṭangin a hmu zo lo a, major tournament-ah free kick a pet goal lo tluang zel bawk - Kum 31-a upa forward hian inelna lianthamah ram tan free kick 36 a pet tawh a, heng zingah hian pet goal a la nei lo.

Ronaldo-a'n hun ṭha nei lo a ni lo. Real Madrid tana season ruk chhung goal 50 khung tling ziah thei forward hian free-kick a hlah bakah a ball tauh ṭha tak leh lei hrula a goal shot chu Austria keeper Robert Almer-a'n a dan sak a, Nani chuan goal post a tauh per bawk.

Austria defender Martin Hin-teregger-a'n penalty area-ah Ronaldo a buan thlu a, a penalty hlawhchhuah pet turin Ronaldo a lo pen chhuak. Mahse, Portugal captain hian Parc des Princes-a amah beiseitu Por-tuguese mipui 20,000 beiseina a ti hlawh-tling zo lo a, goal post a pet per!

Ronaldo-a'n ram leh club tana penalty a pet hnuhnung pangaah vawi li a khung tawh lo a, tun hi ram tana inelna lianthama hun pangngaia penalty a pet goal lohna hmasa ber a ni thung.

Hungary an vannei

Group F inkhel dangah Iceland-in Gyfli Sigurdsson-a penalty khung hmangin hnehna an chang tawh dawn emaw inti mah se hun tawp nan minute hnih chiah a awm tawh tihin Birkir Saevarsson chuan an lamah a ti lut a, team pahnih hi 1-1 in an inhnehtawk.

Hungary tan Gabor Kiraly chuan goal a ven chhunzawm zel a, kum 40-a upa keeper hi Euro-a keeper inlan thei upa ber niin Austria an hneh ṭumin veng ṭha viau mah se Iceland nen hian a chetsual vangin penalty a chawi a, hei vang hian goal an chhuah phah. Crystal Palace keeper hlui hian Hungary thlen thui dan a zirin record thar a siam zel dawn niin a lang.