Spain-in champion zia an chhuah ta

Euro 2016 knockout stage thleng turin Zirtawpni zan khan Spain-in Turkey chu 3-0 in an hneh a, Group D inkhel dangah Croatia leh Czech Republic te an inhnehtawk. Champion lai Spain forward Alvaro Morata leh Nolito te'n goal hmangin an anmahni sawiseltute an chhang let a, a ropui lai chu La Roja mawina hi goal thum hian a sawifiah pha lo!

A ngaihnawm dawn

Group D-ah Spain an ṭha ber a, an phu ang ngeiin point ruk an hmu tawh. La Roja tluk tawk ber tura ngaih chu Croatia an ni a, Ante Cacic hote erawhin Czech Republic laka an goal hnih an hum him zawh loh avangin Saint-Etienne-ah point khat chiah an hlawh chhuak.

Thawhlehni zan dar 12:30 hian Group D-in an match hnuhnung ber an khel dawn a, Spain leh Croatia inkhel tur hi a hmuhnawm ang. Vicente del Bosque hote hi chak tura rinkai zawk an ni a, hei hian Czech Republic tan phurna nasa tak a siam ang. Czech hian group match hnuhnung berah point la hmu lo Turkey an hmachhawn dawn a, pathumna hmunruak pali chuh buai ngai loin pahnihna nichunga last 16 luh theihna kawng a inhawng zau hle.

Spain an sial!

Allianz Riviera, Nice-ah Spain-in an thiamna tak tak an pho chhhuak a, an khingpui Turkey media lam pawhin an hneh lohte khelh dan hi an fak. Vicente del Bosque-a'n Czech Republic an hneh ṭuma player ngai bawk a hmang a, Morata leh Nolito te'n ṭhat phat aṭangin Turkey tlarhnung tan harsatna an siam nghal.

Turkey lam ṭang ve viau mah se minute 34-naa Nolito cross chu Juventus striker Morata chuan goal kilah tak a tauh lut a, Tukish keeper Volkan Babacan dem theih a ni lo. Minute thum hnuah Cesc Fabregas ball vawrh luh chu Turkish defender Mehmet Topal-a'n hmun him lamah a tauh goal thei lo a, striker hriam Nolito-a'n a pet goal chiang hle.

Second half ṭan aṭanga minute thumna lekah Spain-in goal thumna an khung a, Euro 2016-a goal thum khung thei hmasa ber an ni. Goal thumna khung turin La Roja player pakua an inrawlh a (Pique leh Iniesta chiah an tel lo!), vawi 22 an in pass hnuah Jordi Alba chuan mahni hma sial loin Morata a pe a, Juventus striker hian a hmawr a bawk.

Goal thum khung thei Spain hian match hnuhnung 11-ah goal khat chiah an chhuah a, Vicente del Bosque hian tlarhnung lam pawh a ngaihthah lo tih a chiang. Turkey hian kum 62 chhung Spain lakah chak ni hmel an hmu tawh lo a, an record duhawm lo tak hi an la thai chhe thei chuang lo. La Roja erawh an ropui zel a, European Championships-ah match 13 chhung chu chak loh hmel an hmu tawh lo.

Spain an fak

Spain rorelna a inṭan tak avangin Europe a khur. Turkey 3-0 a an hneh danah tun hnai kum 10 chhunga an tlarhma hriam tak kha kan hmu nawn leh a, team ṭha zawk laka an theihna nemngheh chiah an mamawh tawh.

- Gazzetta dello Sport (Italy)

Vicente del Bosque-a'n Morata chunga rinna a nghah ngamna chu a hlawhtlinna hmuhin a awm ta. Morata hi Spain roreltu thar a ni a, Iniesta erawh Spain mawina a la ni reng.

- Tuttosport (Italy)

Tun inelnaa inhneh chianna ber a ni rih a, Spain hian champion tura rinkai ber an ni tih an nemnghet e.

- Bild (Germany)

Kan lama goal ruk emaw goal sarih emaw in khung loh avangin kan lawm e. Kan ram min ti mualphotu player-te kan lawmpui a che u.

- Turkish press

Eng nge an sawi?

Spain boss Vincent Del Bosque chuan, "Kum 2008 aṭanga tun thleng hian Spanish football history-a player ṭha ber ber te kan chan. Chutichung chuan kawng dik kan zawh a, mah se engmah kan la champion lo. Tuna kan khelh lai hi group stage a ni a, knockout stage ka la ngaihtuah thleng lo. Croatia nena kan inkhel tur ka thlir a, point thum hmu thei tur player ka thlang ang," tiin a sawi.

Turkey manager Fatih Terim chuan, "Kan goal chhuah zinga pahnih kha tihsual a ni a, pakhat zawk phei kha chu awihawm loh khawp a mak a ni. Eng pawh chu ni se Spain ka lawm pui a, team danglam tak an ni," tiin a khingpuite a fak.

Croatia an chelh

Saint-Etienne-ah Croatia-in an khingpui Czech Republic lakah inkhel an thunun a, Luka Modric kaihhruaina hnuaiah game mawi an khel. Inkhela chungnung zawk Croatia hian Czech chetsual zarah Ivan Perisic (37') leh Ivan Rakitic (59') hmangin an phu ang ngeiin hma an hruai a, knockout stage thleng turin an dinhmun a ṭha hman hle.

Croatia-in minute 62-naah inhliam vangin Modric an thlak a, Czech Republic lamin substitute awmze nei an siam thung. Bench aṭanga lut Milan Skoda chuan Czech beiseina siam turin ṭha zetin minute 75-naah a tauh lut a, Croatia lam an talbuai chho bawk. Croatia
ṭantuten field chhungah halmawi an vawm luh avangin minute 86-naah inkhel tihtawp a ni a, Czech lamin an chhawr ṭangkai zawk niin a lang.

Minute 93-naah ball-in Croatian defender Domagoj Vida kut a fuh a, Czech lamin penalty hmuin substitute Tomas Necid chuan goal-ah a chantir a, 2-2 in inkhel a tawp.

Eng nge an sawi?

Czech Republic coach Pavel Vrba chuan, "Kan tana pawimawh ber chu kan beidawng lo kha a ni a, kan substitute pahnih khan inkhel an thlak danglam bawk. Ka player-te ka chhuang a, kan tan chuan min ṭantute kha kan player 12-na, 13-na leh 14-na te an ni," tiin supporter te chu an chakna hnar a nih thu a sawi.

Croatia coach Ante Cacic chuan, "Croatia ka enkawl hnua kan khelh ṭhat ber a ni a, chak thei tur kan ni. Goal chance tam tak kan nei a, vawi hnih chiah kan khung. Kan khingpuite pawhin chance an nei ve tho a, kan goal khung zat tho an khung avangin sawi theih a awm lo. Point hnih kan hloh hi pawi ka ti a, football-ah erawh hetiang hun hi a thleng ṭhin. Mipui vanga inkhel tihtawp a nih khan kan ngaihtuahna kha hmun dangah kan pe a, kan tan chuan inzirna tur a ni," tiin an vanduai thu a sawi.