England hmaah Slovakia; Wales-in beisei an la nei

British Derby-a Wales hneh hlim England chuan zanin dar 12:30-ah Slovakia an hma-chhawn dawn a, last 16 lut turin point khat hlawhchhuah a tawk. Slovakia in an match hnihnaah Russia an hneh avangin beisei an la nei ve tho a, chak tumin an khel ang.

Wales-in England laka hma an hruai hnuah point thum hlu tak hloh mah se zaninah insiamṭhatna hun an nei dawn. Gareth Bale-a te ram hian dar 12:30-ah vek group B mawngphah Russia an hmachhawn dawn a, England-in Slovakia an hneh a nih chuan Wales tan last 16 lut turin point khat hlawh chhuah a tawk.

Engtinnge England?

England-in Wales an hmachhawn ṭum-in 4-3-3 formation an hmang a, Roy Hodgson-a'n Russia laka beisei phak lo Harry Kane leh Raheem Sterling ring nawnin Wales lakah inkhel bul a ṭan tir a, a tisual teuh hle. Player pahnih hian firsthalf chhe taka an khelh hnuah Daniel Sturridge leh Jamie Vary-ten an an thlak a, player pahnih hi England chakna an ni.

England legend Alan Shearer chuan, "Roy Hodgson hian Jamie Vardy leh Daniel Sturridge te hi inkhel bul a ṭan tir a hun tawh a ni. Wales laka player pahnihin danglamna an thlen dan ka hmuh khan Slovakia laka inkhel bul ṭan hi an phu a ni," tiin striker pahnih chu group stage-a England match hnuhnung bera inkhel bul ṭan turin a duh - Wales laka an khelh dan ngaihtuahin striker pahnih hian Alan Shearer-a duhthusam an thlentir a nih pawhin a mak lo ang.

Substitute bench aṭanga tlan lut zingah Marcus Rashford a hmuhnawm bawk a, mah se Wales an hneh zawhah Hodgson-a'n, "Goal kan mamawh apianga luhtir turin Jack Wilshere leh Marcus Rashford hi kan ruahmannaah kan telh," tia an ruahmanna a sawi avangin Manchester United rawlthar hian inkhel bul a ṭan beisei a ni lo.

Vardy a vui lo

Jamie Vardy leh Daniel Sturridge ten inkhel bul an ṭan dawn leh dawn loh an sawi nasa a, hetiang karah hian Leicester City striker Vardy chuan starting eleven-ah a tel lo a nih pawhin vuina a neih loh thu a sawi.

Premier League-a Foxes champion puitu striker chuan, "Kan boss kutah engkim a awm a, hnehna chanpui theih tura a ngaih team a remkhawm mai zel a ni. Bench-ah ṭhu tura min duh a nih pawhin kei chuan buaina ka nei lo," a ti.

Striker tlan chak a nih vangin hun tawp lama khingpuite chauh tawh lama tlan turin Vardy hi Hodgson chuan a duh nia sawi a ni. Vardy chuan, "Engmah buaina ka nei lo, khingpuite chauh tawh hnua tlan luh chuan lansarh a awl a, Roy hian inkhel bul min ṭan tir emaw substitute-ah min hmang emaw a nih pawhin buaina ka nei lo," tiin coach kuta a innghah thu a sawi.

Hamsik hoin Slovakia

Slovakia-in Euro 2016-a an beiseina chhi nung turin Wales an hneh loh hnuah Russia an hneh a, match hnihah hian Slovakia player langsar ber chu Marek Hamsik a ni. Slovakia laka hnehna chang tur chuan England tlarhnunga Kyle Walker, Gary Cahill, Chris Smalling leh Danny Rose te inkawp hian Napoli playmaker hi dan theih dan tur an ngaihtuah a ṭul ang.

Russia nen an inhmachhawn ṭumin Slovakia hian 4-2-3-1 formation an hmang a, tlarhnungah Liverpool defender Martin Skrtel chu Slovakia ban rinawm a ni - English striker rual hrechiangtu defender hian England goal khung tur ven dan tur a naute ho a hrilh ṭha hle tawhin a rinawm.

England leh Slovakia hi vawi thum an inhmachhawn tawhah England-in hnehna an la chang fai vek a, Roy Hodgson-a nauten an record duhawm chhawmnun zel an tum ang a, Slovakia in thaichhiat an tum thung ang.

Wales vs Russia

Russia-in khelmual chhunga an chet dan aiin khelmual pawn lama an fan-te chet dan avangin ngaihven an hlawh zawk a, match hnih an khelh tawhah point khat chiah an hlawhchhuah avangin last 16 luh beiseina nei turin Wales lakah chak loh a thiang tawh lo.

Wales-in England an hmachhawn ṭumin 3-4-3 fromation an hmang a, match hnih an khelh tawhah an player-te thawhrimna hmuhmaih theih a ni lo. Tlarhmaah Gareth Bale leh Aaron Ramsey te chu ṭum dang ang bawkin an innghahna an ni leh dawn a, midfield laiah player thawkrim Joe Allen a ṭangkai leh bawk ang.

Team pahnih vawi li an inhmachhawn tawhah Russia an chungnung zawk a, vawi thum a chak zawkah ṭangin vawi khat an inhnehtawk - zanin hi an record duhawm chhunzawm hun tak a ni.

Wales-in match hnih an khelh tawhah Gareth Bale-a'n goal a khung ve ve a, a goal hnih hi freekick aṭanga lut ve ve a ni. Russia tan Wales laka freekick chawi loh a finthlak ang.