Euro 2016 inkhelah Buaina nasa zawk

France rama Euro 2016 khelh meka England leh Russia fan-te an intihbuai hnuah buainain ziaawm lam aiin punlun lam a pan zel. Zirtawpni zana Croatia leh Czech Republic inkhelh ṭumin Croatia fan-ten buaina an siam a, khelmual chhungah halmawi an vawm luh avangin minute 86-naah inkhel chawlh lailawk a ni.

Europe-a football thu-neitu sang ber UEFA chuan Croatia fan-te chet dan hi a chhui dawn a, Turkey an hmachhawn
ṭumin Croatian fans zing-ah khelmuala tlan lut leh halmawi hal an awm avangin Croatia hi hrem an lo ni tawh a, an hmabak a eng lo hle.

Croatia fan-te chet dan-in dem a hlawh a, Croatia boss Ante Cacic pawh a lawm lo hle. Kum 62-a upa manager chuan, "Buaina siamtute hi Croatia fans tak tak an ni lo a, mi hlauhawm leh ngaihtuahna mumal nei lo mihring an ni," tiin ṭawngkam a duhtui lo hle.

Cacic hian a la duh-tawk mai lo. Croatia boss chuan sawi chhun-zawmin, "Croatia fans 95% chuan he thil thleng hi an hrethiam lo a, an zak ngawih ngawih a ni. Heng buaina siamtute hi chu mi 10 vel bak an ni lo a, infiamnaa firfiak pawl an ni. Heng mite hi man chhuah vat an nih ka beisei a, hremna pek ngei an ngai a ni," a ti.

Croatia midfielder Ivan Rakitic chuan, "UEFA hnenah ngaihdam kan dil a, Czech Republic leh khawvel hmun hrang hranga football hma-ngaihtute hnenah ngaihdam kan dil a ni. Heng buaina siamtute hi chu mi 10 vel bak an ni lo a, Croatian FA leh FA president Davor Suker ten theihtawp an chhuah a, UEFA hian min hriatthiam ka beisei a ni," tiin hremna na zawk an tawh a hlau hle.

Zirtawpni zan vek hian Spain leh Turkey in--khelh ṭumin stadium chhunga halmawi ken luh tum La Roja fans pathum chu man an ni a, Turkey erawh sta-dium chhunga hal--mawi hal, field chhunga thil sa khat vawm luh leh field chhunga fan te tlan luta puh an ni a, hremna na zawk hmachhawn thei an ni.