Nou Camp-ah Larsson a kir

Barcelona striker hlui Henrik Larsson chuan Ronald Koeman-a thachhang dawltu ni turin Barcelona coaching team a zawm a, kum hnih chhung atan contract a ziak. 

Kum 48 mi Larsson bakah hian FC Twente leh Hoffenheim head coach hlui Alfred Schreuder chuan Barcelona coaching staff a zawm ve bawk a, Barca insiamṭhat an tum hle. Sweden tan vawi 106 inlana goal 37 khung thei Larsson hian 2004-06 inkar kha Barca tan a khel a, inelna hrang hrangah match 59 khela goal 19 khungin La Liga (2), Spanish Super Cup (1) leh Champions League (1)-ah nomawi a chawi hman. 

Celtic-a a vanglai hun hmangtu striker hian Dutch club Feyenoord tan pawh lo khel tawhin Koeman nen hian 1995-97 inkar khan Feyenoord-ah hian an khel dun a ni. Helsingborg leh Manchester United tan pawha lo khel tawh Larsson hian inkhelh a chawlhsan hnuah an ram club Landskrona, Falkenberg leh Helsingborg a enkawl a, coaching lamah a mikhual lo. 

Hetihlai hian Spartak Moscow chuan Barcelona chu pound maktaduai 90 an nei a nih loh chuan anmahni dawr lo turin fiamthuin an lo hrilh - Larsson-a fapa Jordan Larsson chu Russian club tan hian a khel mek a, a fapa inkhel a en ziah nia an sawi Larsson hi a fapa lakluh tum lo turin an fiam a ni. Kum 23 mi Jordan hian August, 2019 khan  Spartak Moscow hi a zawm a, match 33 khelin goal 12-a khungsak tawh.