Reina-a'n Lazio a zawm

AC Milan goalkeeper Pepe Reina chuan Lazio a zawm a, kum hnih daih contract a ziak. Kum 37 mi Reina hi an ram club Valencia zawm tura ngaih ni hman mah se hun an duh rei avangin a dawh theihnain a tlin ta lo a, Lazio a zawm ta zawk.

Reina hian kum 2018 khan AC Milan a zawm a, khelhna hmun a chan loh avangin Aston Villa-ah January 2020 khan loan-in a kal. English club tan hian league match 12-a khel a, Premier League-a inhamtanpui. 

Spanish keeper Reina hi Barcelona aṭanga inzir chhuak a ni a, Villareal-ah kalin hming a chher. Khawvel hriata a larna tak erawh Liverpool tiin a sawi theih a, English club hi FA Cup, League Cup leh UEFA Super Cup-ah a champion pui.

Reina hi loan-in Napoli-ah a kal a, Coppa Italia-ah an champion. Bayern Munich-ah kal lehin Manuel Neuer-a thachhang dawltu a ni a, Bundesliga nomawi a chawi. Liverpool keeper hlui hi Spain tan vawi 36 a inlan a, Iker Casillas vanglai nen an intawn fuh avangin ram tan a khel tam tawk lo.

Spanish keeper laluttu Lazio hi Serie A-ah palina an nih avangin season tharah Champions League an khel dawn a, Albania international keeper Thomas Strakosha an neih avangin Reina tan khelhna hmun chan a harsa ang.