Rafael Nadal a inpeih

Tukin aṭangin Australian Open khelh ṭan a ni a, world number 1 Rafael Nadal chuan Thawhlehni zingah a match hmasa ber atan seeded chang phak lo Hugo Dellien a hma-chhawn ang.

Nadal hi seeded pakhatna pek a ni, hard court inelna lian hmachhawn tura a inpeih tawh thu a sawi. Nadal chuan, "Grand Slam a nih tawh chuan player zawng zawngin an theihtawp an chhuah ṭhin, kei pawhin chutiang bawk chuan ka ti ang.

"Inelna hi kar hnih chhung khelh tur a nih avangin a tir lamah chuan chesual si lo a thahrui khek thiam a pawimawh leh dawn. Rawlthar ṭha tak tak an rawn chhuak a, anni bakah hian a 

ṭha sa Roger Federer leh Novak Djokovic te an la awm bawk. Inelna nuam leh hautak tak a ni ngei dawn," a ti.

Kum 33 mi Nadal hi a inkhelh thiamna ber chu clay court a ni a, hard court-ah pawh sulhnu a nei ṭha thawkhat hle. US Open-ah vawi li champion tawhin, tuna an khelh tur Australian Open-ah pawh hian 2009 khan hlawhtlinna a lo chang tawh; kuminah pawh rinkai zinga mi a ni.

Grand Slam vawi 19 champion tawh Nadal hian kuminah ATP Cup chiah a la khel a, ram leh ram inelnaah hian singles match pawimawhah Djokovic a hneh lo. Serbian tlangval hi tun ṭumah pawh hian atana hmachhawn hautak ber tura ngaih a ni.

Australian Open hi match hmasa ber zing dar 5:30-ah an khel ṭan ṭhin a, tennis chu a match rei zawng sawi lawk theih a ni lo. Court inangah a indawta khelh ṭhin a nih avangin match hnihna hun tur chiang taka sawi theih a ni lo.

Kumin Australian Open hi court hreng hrang 25 zetah an khel dawn, Rod Laver Arena, Melbourne Arena leh Margaret Court Arena te chu an court neih ṭhat zual niin hengahte hian player langsar leh a ṭhate chu khelhtir an ni ang.