Ljungberg-a'n Arsenal a chhuahsan

Arsenal assistant manager Freddie Ljungberg-a'n chona lian zawk hmachhawn duhin London club a chhuahsan thu Inrinni khan a puang.

Gunners midfielder hlui Freddie Ljungberg hi club ropui vanglai 'Invincibles' zinga mi kha a ni a, season hnih liam ta khan London club-ah rawn letin Mikel Arteta thachhang dawltu a ni.

Nikum November thlaa Unai Emery ban a nih khan hun rei lote chhung Ljungberg hi manager lailawkah dah a ni a. Kum 43 mi Ljungberg chuan, "Coaching career -a hmasawn zel ka duh avangin Arsenal-a first-team assistant coach hna ka kalsan dawn," tiin team enkawltu ber nih a tum ve tawh thu a sawi.

Ljungberg chuan sawi chhunzawmin, "Kum 1998 aṭang khan Arsenal-ah hian ka awm tawh a, player leh coach ni thei tura hun ṭha min pek avangin ka lawm hle. Mikel leh team tan duhsakna ka hlan a, min thlawp ṭhintu Arsenal ṭantute chungah lawmthu ka sawi bawk," a ti.

Swede coach Ljungberg hian 2016-17 season khan Arsenal Under 15 a enkawl a; Ainsley Maitland-Niles, Bukayo Saka, Joe Willock leh Reiss Nelson te chher chhuaktu zinga mi a ni. Ljungberg kalna tur hi la chiang lo mah se manager hna a chelh theihna tur club a zawm ang.

Arsenal technical director Edu chuan, "Tun hnai kum khat chhung khan sawmna tam tak a hmu chungin kan bulah a cham. Tuna chona thar  hmachhawn tura a chhuak hi kan hrethiam hle," tiin a sawi. Gunners-in Mikel Arteta thachhang dawltu tur an lak a ṭul dawn a, hming lamrik zingah Xabi Alonso, Per Mertesacker leh Jesús Casas te an tel.