World Cup champion team aṭangin pathum
FIFA Ballon d'Or award dawng thei tura thlan chhuah player pathum Cristiano Ronaldo, Lionel Messi leh Manuel Neuer te chu rinlawk ang ngeiin 2014 FIFPro World XI team-ah telh an ni.
Thawhṭanni zan khan Kongresshaus, Zurich-ah FIFA Ballon d’Or ceremony neih a ni a, he hunah hian FIFA/FIFPro World XI 2014 pawh puanzar a ni. Player ṭha 11 te hi professional player 20,000 chuang ngaihdan aṭanga lak a ni.
FIFA/FIFPro World XI 2014 te chu :
Goalkeeper: Manuel Neuer
Defenders: Philipp Lahm, Sergio Ramos, David Luiz, Thiago Silva
Midfielders: Angel Di Maria, Toni Kroos, Andres Iniesta
Forwards: Lionel Messi, Cristiano Ronaldo, Arjen Robben
FIFA World Cup 2014 champion Germany aṭangin Neuer bakah Philipp Lahm leh Toni Kroos te chiah telh an ni a, Brazilian defender David Luiz tel ve chuan sawi zui a hlawh viau bawk.
Player thlan chhuah zingah Spanish club tana khel mek player panga an awm a, German club tana khel mek player pathum an awm a, French club tana khel mek pahnih leh English club tana khel pakhat a awm. Bundesliga champion Bayern Munich leh Champions League champion Real Madrid te'n player pathum ve ve an thawh a, anni aia thawh tam an awm lo.
Player thlanchhuah bihchianna
Manuel Neuer : Germany leh Bayern Munich keeper Manuel Neuer hi keeper hmel ti danglamtu a ni. World Cup-a Germany champion-na kawngah player pawimawh a ni a, golden glove a dawng pha hial mah se golden ball dawng thei tur nominee-ah telh a ni lo.
Bayern tan pawh Neuer hi a che ṭha hle a, 2013/14 season-ah Bundesliga-ah vawi 31 inlanin vawi 72 save a nei a, clean sheet vawi 15 zet a nei. 2014/15 season-ah record a nei ṭha lehzual a, match 17-ah clean sheet vawi 13 a nei tawh a. Inelna hrang hrangah Bayern-in champion turin beiseina an la nei vek bawk.
Philipp Lahm : Germany innghahna a nih tluk zeta Bayern Munich innghahna Philipp Lahm hi feet 5 leh inches ruk leka sang a ni. Bayern boss Pep Guardiola hnuaiah midfield-ah a inlan ṭhin avangin ram lamah pawh midfield-ah hmuh a ni fo a, tlar hnung lamah chuan ding leh veiah khawvela player ṭha ber zinga mi a ni. Kum 31 leka upa ni mah se hun rei zawk a inkhelh theih nan World Cup zawh khan ram tana inkhelh a chawlhsan.
Sergio Ramos : 2014 World Cup aṭanga thlir chuan Spanish defender Ramos tel ve hi thil mak a ni. Amaherawhchu, Real Madrid tan season liam ta khan a che ṭha a; Champions League, FIFA Club World Cup leh leh Copa del Rey-ah Real Madrid hi a champion pui a, defender ni chungin goal pawimawh tak tak a khung.
David Luiz : Brazilian defender Luiz hian nikum khan pound maktaduai 50-in Chelsea aṭangin PSG a zawm a, a man to lutuk hi mak tih a hlawh hle. Chelsea manager Jose Mourinho-a'n a mamawh loh thu a sawi a, hemi zawh hian World Cup-ah Luiz hi a mualpho zui bawk. Semifinal-ah Germany lakah Brazil 7-1 in an tlawm a, pathumna zawnnaah Netherlands lakah 3-0 in an tlawm bawk - Luiz hi mawhphurtu zingah a tel. Tun ṭuma a tel ve hi hrethiam lo an tam hle.
Thiago Silva : World Cup a Luiz-a kawppui Thiago Silva hian hrem vangin Brazil-in Germany an hneh loh ṭumin a khel lo a, hei vang hian Silva ang em em a mualpho ve ve lo. Chutihrualin Silva hi Netherlands laka an chak loh ṭumin a khel thung. Amaherawhchu Silva hi club tan a che ṭha a, PSG chu Ligue 1 leh Coupe de la Ligue-ah a champion pui.
Angel Di Maria : Nikum khan Manchester United-in British record fee pound maktaduai 59.7-in Real Madrid aṭangin an la lut a, Premier League club aṭanga thlanchhuah awmchhun a ni. Champions League-a Real Madrid an champion ṭumin final-ah man of the match a thlan a ni a, World Cup-ah erawh inhliam vangin a khel thei lo. Mipui tam tak chuan Di Maria hian final khel se chuan Germany hi an champion kher lo ang an ti ve hial. Amaherawhchu, Real-ah Ronaldo thla zar hnuah a lar thei tawk lo a, Argentina-ah Messi a awm tlat bawk avangin fak a hlawh tawk lo.
Toni Kroos : Germany ball sem khawl Toni Kroos awm hnuah Mesut Ozil a hming a ri tlem sawt a, club leh ram tana dead ball zawng zawng deuh tho a pet theih avangin Kroos hi player ṭha bik a ni tih a chiang. FIFA World Cup 2014-ah assist a ngah ber a, All Star Team leh Dream Team-ah telh a ni a, Champions League team of the season-ah telh a ni bawk.
Season liam ta khan Bundesliga leh DFB Pokal-ah Bayern a champion pui a, Real Madrid a zawm hnuah UEFA Super Cup leh FIFA Club World Cup-ah a champion nomawi a chawi leh tawh bawk.
Andres Iniesta : Player thiam bik an awm a, ngaihsan rawn an nih ṭhin avangin hetiang player hi chuan an phu vak loh ṭum pawhin chawimawina an dawng leh nawlh ṭhin. Spanish midfielder thiam zet Andres Iniesta tan kum 2014 hi a chhinchhiah tlak lem lo hle. Spain-in World Cup-ah group stage an paltlang lo a, Barcelona-in nomawi an chawi lo bawk. Chutihrualin Iniesta hi 2014 khan La Liga best attacking midfielder-ah thlan a ni a, awm lo hul hual chu a ni bik lo e.
Arjen Robben : Dutch winger Arjen Robben chet ṭhat zarah Netherlands chu World Cup-ah pathumna an ni. Robben hi World Cup 2014-ah khan Golden Ball award dawng thei tur player 10 zingah thlan tel a ni a, Bronze Ball award a dawng.
Club lamah pawh a che ṭha a, Bayern Munich chu Bundesliga leh DFB Pokal-ah a champion pui. FIFA Ballon d'Or-ah palina a ni pha a, 2014 khan Dutch Sportsman of the Year a thlan a ni bawk.
Ronaldo & Messi : Player ropui pahnihte hi an inkhelh ve tawh chuan goal an khung deuh zel a, midang aiin an hmuhnawm bik ṭhin a, an khel lai kan hmu thei hi kan vannei hle a ni.