Puskas Award dawngtu James

Goal hi chu engtin pawhin lut se a pawimawh dan a inang vek an ti ṭhin. Amaherawhchu, goal nalh bik leh hlu bik a awm a, chutiang goal chuan hriatreng a hlawh ṭhin. Puskas Award hi goal nalh bik khungtu hnenah pek ṭhin a ni a, Colombia midfielder James Rodriguez-a'n a dawng.

World Cup 2014 Round of 16-ah Maracana stadium-ah Colombia leh Uruguay an inkhel a. Real Madrid midfielder James hian box pawn aṭangin a awmin ball a la thla a, lei a thlen hmaa volley nghalin goal ropui a khung. Colombia hi 2-0 in an chak zui a, quarter final an thleng.

James chuan, "Min vote-tu zawng zawng chungah lawmthu ka sawi a. He hun hi kei leh Colombia a chengte zawng zawng tan hun danglam bik a ni a, ka lawm takzet," tiin a sawi.

Goal mawi hi a thlang­tu a zir a ni a, dawng pha ve lo Netherlands forward Robin Van Persie leh Republie of Ireland forward Stephanie Roche goal khung pawh hi mawi tak a ni.

Manchester United forward hian World Cup group stage-ah Australia an hneh ṭumin halfway line pelh hret aṭanga Daley Blind-a ball vawrh luh chu dive chungin a tauh lut a, lu hmanga goal khung mawi ber zinga mi a ni.

Republic of Ireland hmeichhe team tana khel pha Stephanie Roche goal khung hi tam tak chuan goal mawi ber a ni an ti. Wexford Youths lamah James-a goal khung ang deuhin Peamount United tan Roche hian a volley goal a, Colombia star khung aiin a harsat hmel zawk.

Lawmman dawng tura rin ni mah se Roche hian a dawn loh vangin a hnual chuang lo a, a hero Cristiano Ronaldo a hmuh theih vang hrim hrim pawhin a lawm.

Roche chuan, "Puskas Award dawng thei tur nominee zingah ka tel tih email-a ka dawn khan mak ka ti. Hetiang hun pawimawhah hian ka tel ka ring ngai lo. Ka tel hrim hrim hi ka lawm a, Ronaldo ka hmu thei hi ka hlim a ni. Man United fan ka ni a, Ronaldo hi ka hero a ni," tiin a sawi.