Career match 1000 chak thei Brisbane International champion FEDERER

Tennis history-a hming dai tawh lo tur Roger Federer chuan a career-a match 1000 a chaknaah Brisbane International tennis inelnaah a champion.

Pathianni khan Federer hian Brisbane International final-ah Canadian Milos Raonic chu 6-4, 6-7 (2), 6-4 in a hneh a, vawi 17 Grand Slam title la tawh tan champon kalkawng hi a awlsam lo hle. Swiss tennis player hian Jimmy Connors (1,253) leh Ivan Lendl (1,071) te hnung zuiin vawi 1000 chak thei zingah a tel a, mipa tennis player zingah hetiang record duhawm nei thei pathumna a ni.

Swiss tennis player hian Australian Open ṭan hma ngeiin record thar neih a duh tih a lang a. First set-ah vawi riat lai ace neiin 6-4 in set hmasa ber a la a, second set erawh a chesual a, tie break-ah Raonic-a'n a zawnin vawi sarih ti dikin set hnihna a la.

Third set-ah Federer-a'n a tawnhriat a hmang ṭangkai a, Raonic-a lakah ṭum thum zet break point pumpelhin 6-4 in set thumna lain a champion.

Kum 33-a upa Federer chuan, "Title ka lak bakah leh number special tak ka thlen theih avangin ka tan chuan ni chhinchhiahtlak tak a ni. Tuna ka chak hi tun hmaa vawi tam tak ka lo chak tawh aiin a danglamin ka hria, number hi ka ngai pawimawh ngai lo a, amaherawhchu 1000 hi chu a special bik a ni," tiin a sawi.

Federer chuan, "Kan inkhelh dan thlir kirin player ṭha tak laka harsa taka chak kha a lawmawm bik. Chak turin ka theihna zawng zawngin ka khel a, ka tlan tam bakah ka rilru pawh ka hmang nasa. Vawiin inkhel hi ka theihnghilh tawh lo ang," tiin a sawi.

Federer hian Austra­lian Open-ah beisei a neih thu a sawi a, champion chu inring lo se Melbourne a pan loh tur thu a sawi.