Morrison ka nghak thei tawh lo - Allardyce

Field pawna nungchang ṭhat loh vanga nih tur ang ni pha lo Ravel Morrison chu West Ham-in chhuah tir an hreh lo. Hammer manager Sam Allardyce chuan Man­chester rawlthar hi a nghah theih tawh loh thu a sawi.

Sam Allardyce chuan, "Player talent tak tak ka enkawl tawhte hian hun rei tak hnuah kan inhmuh leh hian an inchhir thu min hrilh ṭhin. Football khel turin talent neih a tawk lo a, chumi piah lam daih chu a ni. Ravel hian talent chu a nei a, hmang chhuak tur chuan a nun dan a thlak hi a ṭul a ni. Talent nei ṭha tak hun khawhral lai ṭhu chunga thlir reng hi ka thei tawh lo," tiin a sawi.

West Ham tana a khelh hnuah Morrison hian loan-in Birmingham City, Queens Park Rangers leh Cardiff City te a zawm a. A khelhna hnuhnung ber Cardiff-ah hian training-naa a chet dan inthlak danglam nasat avangin manager Russell Slade a ngaihdan a ni lo hle.

Sam chuan, "Cardiff-ah Ravel hi a che ṭha lo. Ama ṭhatna tur ngaihtuah ṭhin se chuan tun aia dinhmun ṭha zawkah hian a awm tur a ni a, amaherawhchu tunah dinhmun khirh takah a awm mek a ni," tiin a sawi.

Morrison hian West Ham a zawm dawn hian Sir Alex Ferguson-a'n manager Sam Allardyce bulah player ṭha bik a nih thu leh world class player a nih theih thu a hrilh a. A mamawh chu Manchester chhuahsan a nun thar neih a nih thu a hrilh. Amaherawhchu, West Ham-ah Morrison-a'n nun thar a nei chuang lo a, Premier League club tana a chance vawihnihna a hmang ṭangkai thei lo.

Kum 21 a upa Morrison hi Lazio-in an duh a, Rome club hi a zawm ngei rin a ni.