Footballer ṭha ber Cristiano Ronaldo

FIFA Ballon d´Or an sem a, Real Madrid star Cristiano Ronaldo hnenah hlan a ni. He Portugal international hian he chawimawina sang hi ṭum thum a dawng ta.

Ronaldo hian vote 37.66 a hmu a, a sang fal hle a, Lionel Messi chu pahnihna niin Barcelona leh Argentina star hian 15.8% a hmu. Pathumna chu Bayern Munich leh Germany goalkeeper Manuel Neuer niin 15.7% vote a hmu a ni.

Chawimawinaa phû

Ronaldo hian kum 2014 chhung khan khelmualah hlawhtlinna ropui tak tak a dawng a, Real Madrid chu hun rei tak hnuah Champions League-ah a champion-pui a, goal 17 thunin Champions League-a season khata goal thun hnem ber record a siam. European Golden Shoe lawmman dawngin Luis Suarez nen goal 31 ve ve an khung a; nimahsela World Cup-ah an ram chu first round a paltlangpui zo lo.

Manchester United player hlui hian nikum chhung khan Real Madrid leh Portugal tan goal 61 a thun a, World Cup playoff-ah an ram a chakpui a, Brazil-ah che ṭha chhunzawm lo mah se Real tana a khelh ṭhat avangin he chawimawina hi a dawng ta a ni.

King's Cup-ah Real Madrid a champion-pui bakah UEFA Super Cup leh Club World Cup-ah a chamnpion-pui a; La Liga-ah top scorer a ni tel a, La Liga-ah hian game 30 khelin goal 31 a khung a, minute 62 zela goal khat khung ang a ni. Hei mai hi a ni lo, kum 2014 chhung khan a ṭhiante goal thun tur ṭum 22 ngawt a siamsak bawk a ni.

Ronaldo a lawm e

Cristiano chuan chawimawina sang a vawi thumna atan a dawng chu, "Ka lawm ngei mai. Player ṭha ber chawimawina hi vawi thum ka dawng ang tih ka ngaihtuah phak ngai lo," a ti.

Kum 2014 chu, "Theihngilh theih tawh ngai loh kum a ni," a ti a, "He chawimawina ang chi hi chu a ropui danglam a, ka sawi theih awm chhun chu tuna ka tih mek anga rim taka beiha hmalam pana kal zel ka tum a, hei aia tam chawimawina dawn hi ka duh a, mimal leh team chawimawina tam zawk dawn tumin ka bei zel ang... hengte hi ka nu, chung lam aṭanga min thlirtu ka pa (a boral tawh) leh ka fapa tan a ni e," a ti.

Portugal captain chuan, "Min vote-tu zawng zawng chungah lawmthu ka sawi a, ka coach, ka player-puite leh kan club president chungah pawh ka lawm... a ni tela hmasawn zel hi ka duh a, Portuguese mipui zawng zawng hnena ka sawi duh chu he chawimawina hi vawi thum ka dawn theih hi ka inring ngai lo...," a ti.

Ronaldo hian hmasawn zel a tum a, "Keimaha awm reng ṭhin chu khawvela ṭha ber nih duhna hi a ni a, football khawvela piang tawh zinga ropui ber nih hi ka duh a, zaninah hian in zavaia chungah ka lawm e," a ti a, a au zui vak a ni!

Ronaldo vs Messi

Football khawvela player khaikhin hlawh ber pahnih chu Ronaldo leh Messi hi an ni awm e. Spanish club inhala khel an ni a, player ropui an ni ve ve a, footballer piang tawh zinga riopui ber pawla chhiar tel tur an ni ang.

Tun ṭum zet chu Messi aiin Ronaldo a che ṭha a, chu chu an vote hmuhah chiang takin a lang a, Messi pawhin, "Chawimawina dawn hi a phu a ni," a ti. Messi hi mimal takin a che chhe hran lo a, kum 2014-ah goal 56 lai a thun a; nimahsela Barcelona chu engah mah an champion lo a, Champions League semi final pawh an thleng lo a, World Cup-ah final-a chak lo team-ah a tel bawk.

Messi hian Barca tana ngaih tiṭha lo thu a sawi zauh a, "Nakkumah khawiah nge ka awm dawn ka hre lo a, ka sawi thei lo. Ka sawi fo erawh chu Barcelona-ah hian ka hun tawp hman ka duh a; nimahsela Cristiano sawi angin thil hi a inthlak thut thei reng a, kan hmalam hun hi chu Pathian chauhin a hria a ni," a ti.

Manager Luis Enrique nen an inkar chanchin an zawh chu, "Manager leh player inlaichinna pangngai a ni a, thil danglam a awm lo," tiin tun hnaia an manager nen an inhmuthiam lo anga an sawi chu a pha.

Messi angin Ronaldo hian FIFA Ballon d´Or hi ṭum li a dawn theih mai ringtu an pung zel a, he mi chungchang an zawhna chu, "A palina maw? Tun season-a kan khelh danin a hril ang chu, hei hian tun aia nasa zawka bei turin min fuih dawn a, nakkumah ka tel phak leh phak loh kan hria ang chu... a vawi thumna atana chawimawina dawn hi a hmasa ber ai khan a hautak zawk a ni," tiin Ronaldo chuan a sawi.

Messi berin 'chawimawina dawn a phû,' tia a sawi chu Ronaldo chuan lawmawm a ti a, "Leo thusawi ngei ngaihthlak chu a nuam khawp mai... kan teammate-te mai ni loa kan elpuite fakna dawn hi a nuam a, kei pawhin ani hi ka dah sang hle a ni. Amah vangin player ṭha zawk ka nih theih phahin ka inhria a, hei hi mi pawhin an sawi a, a nih pawh a ni thei ang. Thil ṭha tak a ni," tiin Messi nen an inelna chu a hlawkpui thu a sawi.