Arsenal zawm tur Gabriel Magalhaes

Brazilian defender Gabriel Magalhaes chuan Arsenal a zawm dawn, a khelh mekna Lille leh Gunners ten inremna an siam tawh. Magalhaes hian season nga daih contract a ziak dawn a, a man chu pound maktaduai 27 bawr vel a ni ang.

Kum 22 mi Gabriel hi Napoli pawhin lak tumin tha an thawh a, club lian dang Manchester United leh Manchester City te pawhin an ngaihven bawk, sum um ni se chuan North London club a pan kher lo mai thei.

Mahse Gabriel-a'n inkhelh tam theihna tura a beisei Gunners pan a duh, coach Mikel Arteta-a hmathlir leh khelhtir dan chuan a hmin nia sawi a ni. Nimin tlai thleng kha chuan contract an la ziak lo, tun karah an ziak fel hman tura ngaih a ni thung.

Gabriel hian 2017 khan Brazilian club Avai aṭangin Lille a zawm. A kum a la naupan avangin French club tan hian khelhna hmun a chang mai bik lo, loan hmangin Troyes leh Dinamo Zagreb tan khelin a intuaihriam hmasa.

Season liam ta khan Ligue 1-ah hlawhtling takin a khel a, 6 ft 3 in a sang defender hi hmabak nei eng tak a nih avangin club lian hoin an hnena khel turin an duh, league lian leh hautak khel turin a ṭha tawk em tih erawh fiah a la ni lo thung.

Tun kar tawp khan French Ligue 1 season thar an khel ṭan leh tawh a, Rennes nena inkhel Lille squad-ah Gabriel hi telh a ni lo. Arteta-a'n tlarhnung laia khel turin William Saliba, David Luiz, Pablo Mari, Shkodran Mustafi, Rob Holding leh Sokratis Papastathopoulos te a nei sa a, rawlthar Gabriel tan hmun chang tur chuan thawhrim a ngai dawn, chutihrualin an neih sa ṭhenkhat hi an hralh a rinawm.

North London club hian tun nipui bazar chhungin Chelsea tana contract hmang zo Willian an la fel tawh a, captain Pierre-Emerick Aubameyang pawhin season khat daih chauh contract a neih chu a pawtsei dawn hnai niin an sawi bawk.