Cristiano Ronaldo

Maria Dolores dos Santos Abeiro hi Portugal-a Madeira-a eisiam a ni a, February 5, 1985 khan fapa a nei a, a hmingah Cristiano Ronaldo a sa. 'Ronaldo' tih hi US president hlui Ronald Reagan a ngaihsan vanga a phuah a ni.

Ronaldo-te chhungkua hi chhungkaw rethei tak an ni a, amah ngeiin an naupanlaia an harsatzia hi a sawi chhuak. An unauin pindan hrang pawh nei zo loin pindan khatah an mu khawm vek a, a naupan têt aṭanga football tuichilh mi a ni.

Ronaldo pa hi an khaw club Andorinha-ah bungkaw enkawltu (kitman) a ni a, he club-ah hian a fapa kum riat mi Ronaldo chu a ziak lut ve nghal a ni. Kum lamah naupang mah se Sporting chuan a talent an hriat chian avangin an academy-a zir turin an lalut thuai a, amah chiah hi season khat chhunga Sporting Under 16, Under 17, United 18, B Team leh first team-a khel vek thei a la awm - hei hian kum naupang tê ni chunga football-a a hmasawn chakzia a tichiang ber ang.

Arsenal boss Arsene Wenger chuan kum 2002, November-ah Ronaldo hi a lo hre kar tawh a, Arsenal training-na hmunah a lo sawm daih tawh! Hetihlai vel hian Ronaldo agent chuan Liverpool manager Gerard Houllier hnenah Ronaldo thiamzia hi a lo hrilh tawh bawk a, Barcelona president Juan Laporta hnenah pawh a hrilh bawk a, an la lo vek.

Kum 2003-2004 season ṭan dawnah Manchester United leh Sporting chu Lisbon-a Sporting khelmual Estádio José Alvalade hawnnaah an inkhel a, hei hi Ronaldo nuna inkhel pawimawh ber a ni hial ang. United player-te chuan Portuguese rawlthar che vel an hmuhin thiam an ti takzet a, an manager Sir Alex ferguson hnenah lei ngei turin an ngen a, pound maktaduai 12.24-in an lei a, No. 7 an pe hial.

Man United-a a khelh dan leh Real Madrid-a a puitlin takzia chu khawvelin a hre tawh. Football khawvel chawimawina sang ṭum thum - 2008, 2013, 2014 a dawng tawh a; mimal chawi­mawina dang a dawnte hi lo dah ṭha ta pawh ni ila FIFA FIFPro World XI-ah a zawna kum 2007, 2008, 2009, 2010, 2011, 2012, 2013, 2014 chhung an thlang hian a ropuizia a tichiang hle.