Dinthar leh Aizawl FC an chak chiang

Mizoram Premier League Under 17 khelh mekah nimin khan Dinthar FC leh Aizawl FC chuan goal li ve ve an thun a, an khingpuite hnehin group B aṭanga semi final lut turin an dinhmun a ṭha dun hle.

Dinthar FC hian Reitlang FC chu 4-0 in an hneh a, a khelah pawh an chungnung zawk. Dinthar FC tan Vanlalhriata'n goal hnih a thun a, ani hian minute 55-na leh 85-naah a thun a, he mi hma hian inkhelh ṭan hnu lawkah Calvin Vanlalpeka'n goal a khung a, Lalawmpuia'n half time dawnah a thun bawk. Dinthar FC hi inbuatsaihna pawh nei ṭha, MPL Under 17 atana inpeih tawh team an ni a, Reitlang pawh hi an chhe lo a, an fitness a ṭha tawk lo deuh niin a lang.

Aizawl FC-in goal an chhuah hmasak hnuah Bethlehem Vengthlang FC 4-1 in an lehthal. Nimin chawhnua Lammuala inkhelah Aizawl FC hian si an phur hmasa zawk a, first half tawp dawnah BVT tan Lalruatkima'n goal a thun. Hei hi second half ṭan hnu lawk, minute 50-naah Rochharzela'n a sût a, he mi hnu hian Jonathan Lalrawngbawla'n minute 62-naah a khung a, Lalmuanzova'n minute 80-naah thunin Vanlalawma'n minute 85-naah a thun belh leh a, 4-1 in an ṭin ta a ni.

Vawiin chu Rajiv Gandhi Stadium, Mualpui lamah an inkhel ve thung dawn a, dar 2:00-ah Mizoram Police FC leh Chanmari FC-te an intum ang.