Quarterfinal-ah Australia leh South Korea

Asian Cup-ah a thlengtu Australia leh South Korea te'n nimin khan an khingpui Oman leh Kuwait hnehin quarterfinal an lut.

Sydney-a Stadium Australia-ah minute 27-naa midfielder Matt McKay goal hmangin Australia-in hma an hruai a, minute thum hnuah striker Robbie Kruse-a'n goal hnihna a khung leh a, first half tawp hma hretin Mark Milligan-a'n penalty aṭanga khungin Australia-in first half-ah 3-0 in hma an hruai.

Second half-ah Australia-in inkhel an thunun chhunzawm a, minute 70-naah Tomi Juric-a'n goal lina a khung a, a bak erawh an khung belh tawh lo.

Australia hian Oman 4-0 a an hneh hma hian Kuwait 4-1 in an lo sawp tawh a, point ruk hmuin quarterfinal an lut chiang tawh a ni.

Group A hmahruaitu tur erawh a la chiang lo a, Australia hian an match hnuhnung berah anmahni ang bawka point ruk hmu tawh South Korea an hmachhawn ang.

South Korea hian nimin khan Canberra Stadium-ah damlohna leh inhliam vangin player pasarih ngawt chhawr thei lo mah se minute 36-naa Nam Tae Hee goal hmangin Kuwait an hneh tho. South Korea hian goal khat bawkin Oman an lo hneh tawh a, tun inelnaah hian point ruk an hmu tawh nachungin mipui beisei an la pha lo.

Vawiin hian Group B te'n Asian Cup hi an khel chhunzawm ang. Chhun dar 12:30-ah North Korea leh Saudi Arabia an inhmachhawn ang a, tlai dar 2:30-ah China leh Uzbekistan te an inkhel leh ang.