Spain-in Adama Traore an ko
September-a Nations League khel tur Spain chuan squad an puang a, Germany leh Ukraine hmachhawn tura koh zingah Wolverhampton Wanderers winger Adama Traore a tel.
Spain tana age level hrang hranga lo inlan tawh Traore hian January khan international level-ah Spain leh Mali tana inlan turin a duh zawk ram a la thlan fel loh thu a lo sawi tawh a, Spain-in an koh takah chuan a hnar phalin a rinawm chiah lo.
November thla pawh khan Spain hian an ram tana khel turin an lo ko tawh a, mahse hliam vangin a inhnuhdawh a ngai thung. Spain manager Luis Enrique chuan, "England-a season hnih a hman liam takah khan hma a sawn takzet tih ka hria.
"Chak duhin a tui hal reng a, hmasawn a duh reng bawk. Kan team tan player ṭangkai tak a nih theih ka beisei a ni," a ti a, Barcelona boss hlui fakna hi Traore tan chuan thu hriat nuam a tling ang.
Spain hian tun season-a Barca tana goal riat khungtu Ansu Fati chu an ko bawk a, kum 17 mi rawlthar duhawm tan Spain senior team-a koh a nih hmasak ber a ni.
Manchester City rawlthar ṭhangduang pahnih Eric Garcia leh Ferran Torres chu a vawi khat nan koh an ni bawk a, kum 19 mi Garcia hi Barcelona nena sawizawm mek niin kum 20 mi Torres hian August 4 khan pound maktaduai 20.8-in City a zawm ve chiah thung - season hmasa khan Valencia tan a khel.
Spain hian Nations League-a an match hmasa berah September 3 zanah Germany an mikhual ang a, September 6 zanah Ukraine an mikhual leh bawk ang.
Spain squad:
Goalkeepers: David de Gea (Manchester United), Kepa Arrizabalaga (Chelsea), Unai Simon (Athletic Bilbao)
Defenders: Jesus Navas (Sevilla), Dani Carvajal (Real Madrid), Sergio Ramos (Real Madrid), Pau Torres (Villarreal), Diego Llorente (Real Sociedad), Jose Gaya (Valencia), Sergio Reguilon (Sevilla), Eric Garcia (Manchester City)
Midfielders: Fabian Ruiz (Napoli), Thiago Alcantara (Bayern Munich), Sergio Busquets (Barcelona), Rodri (Manchester City), Mikel Merino (Real Sociedad), Dani Olmo (RB Leipzig), Oscar Rodriguez (Leganes)
Forwards: Rodrigo Moreno (Valencia), Mikel Oyarzabal (Real Sociedad), Adama Traore (Wolves), Marco Asensio (Real Madrid), Ansu Fati (Barcelona), Ferran Torres (Manchester City)